ایشوریا رائے کی ایک اور تصویر نے سب کی توجہ حاصل کرلی ، ابھیشیک سے طلاق کی افواہیں پھر سے زور پکڑ گئیں

ممبئی (ڈیلی پاکستان آن لائن) بھارتی اداکار ابھیشیک بچن سے طلاق کی افواہوں کے بعد ایشوریا رائے کی ایک اور تصویر نے سب کی توجہ حاصل کر لی ہے۔ اس تصویر میں اداکارہ اپنے خاندان کے ساتھ موجود ہیں، جبکہ ابھیشیک وہاں سے غائب ہیں۔

یہ بھی پڑھیں: دنیا کی سب سے وزنی بلی انتقال کر گئی

خاندانی تقریب میں شرکت

جیو نیوز کے مطابق، اداکارہ ایشوریا رائے نے ایک روز قبل اپنے اہلِ خانہ کے ساتھ وقت گزارا۔ وہ اپنی بیٹی ارادھیا بچن اور اپنی والدہ برندا رائے کے ساتھ ایک سادہ سالگرہ کی تقریب میں شریک تھیں۔ سوشل میڈیا پر وائرل ہونے والی تصویر میں ایشوریا کو اپنی بیٹی کے ہمراہ اپنے کزنز کے ساتھ پوز دیتے دیکھا جا سکتا ہے۔ ارادھیا اس دوران اپنی سکول کی جرسی میں نظر آئیں۔ یہ تصویر غالباً ایشوریا کی کزن کی سالگرہ کے موقع پر لی گئی تھی، جہاں انہوں نے اپنے دوستوں اور فالوورز کا سالگرہ کی مبارکباد دینے پر شکریہ ادا کرتے ہوئے یہ تصویر شیئر کی۔

ابھیشیک بچن کی واپسی

خیال رہے کہ ابھیشیک بچن ایک روز قبل ہی ممبئی واپس آئے تھے اور انہیں ممبئی ایئرپورٹ پر دیکھا گیا تھا۔ ایشوریا رائے اور ابھیشیک بچن کی طلاق کی افواہیں کئی مہینوں سے گردش کر رہی ہیں۔ دونوں کی شادی کو 17 سال ہو چکے ہیں اور ان کی ایک بیٹی ارادھیا بچن ہے۔ ان افواہوں کا آغاز اس وقت ہوا جب ایشوریا نے امبانی کی شادی میں بچن خاندان کے ساتھ شرکت نہیں کی تھی اور وہ اس کے بجائے اپنی بیٹی کے ساتھ تنہا نظر آئیں۔