آسٹریلیا کی ٹیم 140 رنز پر آؤٹ، کیا پاکستان میں فاسٹ بولرز کی فیکٹریاں ہیں؟

پاکستان کی شاندار کارکردگی کے بعد یہ کیسے ممکن تھا کہ سوشل میڈیا پر اس کی بات نہ ہو۔

کرکٹ کے تجزیہ کار مظہر ارشد نے ایکس پر محمد رضوان کی کپتانی کی تعریف کرتے ہوئے لکھا کہ 'رضوان کی کپتانی کا ایک اور پہلو جو قابل ستائش ہے وہ یہ ہے کہ انہوں نے تینوں میچوں میں یہ محسوس کیا کہ 50 اوورز سے پہلے 10 وکٹیں حاصل کی جا سکتی ہیں، اسی لیے انہوں نے سپنرز کا زیادہ استعمال نہیں کیا اور حالات کو مد نظر رکھتے ہوئے فاسٹ بالرز کو موقع دیا۔'

مظہر کی طرح ایک اور صارف نے کپتان محمد رضوان کی تعریف کرتے ہوئے لکھا کہ 'رضوان اس پوری سیریز میں صرف چار بالرز کے ساتھ کامیاب رہے اور زبردست کارکردگی دکھانے میں کامیاب رہے۔'

ایک صارف نے تو ایکس پر پاکستانی فاسٹ بالنگ کے بارے میں یہاں تک کہا کہ 'کیا پاکستان میں فاسٹ بالرز کی فیکٹریاں ہیں جہاں سے مسلسل عالمی معیار کے فاسٹ بالرز سامنے آرہے ہیں؟'

ایک اور صارف نے پاکستانی بالنگ لائن اپ کی ستائش کی اور لکھا کہ 'میں نے اپنے فاسٹ بالرز کو اتنا خطرناک ایک طویل وقت کے بعد دیکھا، ہمارے لڑکے بڑی ترقی کر رہے ہیں۔'

جہاں ایک جانب سب رضوان اور ان کی حکمت عملی پر سوشل میڈیا پر بات کر رہے ہیں، وہاں کچھ صارفین نے اس لمحے کا ذکر بھی کیا جب ایک تھرو کو پکڑتے ہوئے شاہین شاہ آفریدی کے بائیں ہاتھ کے انگوٹھے پر گیند لگی، تو فزیو سے پہلے بابر شاہین کے پاس پہنچے اور ان کے انگوٹھے کی مالش کرتے نظر آئے۔

ایک صارف نے یہ سب دیکھ کر ایکس پر بس اتنا لکھا کہ 'رضوان کی کپتانی میں بابر اور شاہین کو دیکھیں۔'

ایک اور صارف نے ایکس پر لکھا کہ 'جب شاہین کے انگوٹھے پر گیند لگی، تو بابر فزیو کے پہنچنے سے پہلے شاہین کے پاس تھے۔'

آج کے میچ میں پاکستانی فاسٹ بالرز کی کارکردگی تو ایک طرف، مگر اس کے ساتھ ساتھ سوشل میڈیا پر پاکستانی کرکٹ ٹیم کے نئے کپتان محمد رضوان کی حکمت عملی بھی کئی لوگوں کی پسند بن رہی ہے۔

ایک صارف نے لکھا 'اس بات کا اظہار کافی عرصے سے کیا جا رہا تھا کہ محمد رضوان ایک اچھے کپتان ثابت ہو سکتے ہیں، انہیں اس بات کا بہتر اندازہ ہے کہ فاسٹ بالرز کو کب اور کیسے استعمال کرنا ہے، ایک طویل انتظار کے بعد اب پاکستانی کرکٹ درست راستے پر ہے۔'

ایک اور صارف نے ایکس پر رضوان کی کپتانی کے بارے میں اپنے خیالات کا اظہار کچھ اس طرح کیا 'کیا آپ جانتے ہیں کہ آسٹریلیا کے کسی بھی بلے باز نے پاکستان کے خلاف اس سیریز میں کوئی بھی نصف سینچری سکور نہیں کی ہے۔ ہم رضوان کے دور میں جی رہے ہیں۔'

پاکستانی ٹیم کی جانب سے اس میچ میں کوئی تبدیلی نہیں کی گئی، تاہم آسٹریلیا نے پانچ تبدیلیاں کی ہیں، جن میں کوپر کونولی، مارکس سٹوئنس، شان ایبٹ، سپینسر جونسن اور لینس موریس کو موقع دیا گیا ہے۔