شیو سینا کی سیاست میں تبدیلی: بال ٹھاکرے کے بیٹے جن کا ہندوتوا ‘مراٹھی میں لکھا قرآن’ ہے۔

عبدالحمید مغربی ریاست مہاراشٹر کے شہر ناگپور کے رہائشی ہیں، مگر وہ پچھلے 28 سال سے ممبئی میں ٹیکسی چلا رہے ہیں۔

مہاراشٹر کے انتخابات کے حوالے سے ان کا کہنا ہے کہ یہ الیکشن ’کھچڑی جیسا ہوگیا ہے۔ فیصلے کرنا مشکل ہوگیا ہے کہ کون کس کے ساتھ ہے۔‘

ادھو ٹھاکرے کی مسلمانوں تک پہنچنے کی کوششوں کے بارے میں وہ کہتے ہیں: ’ادھو کی شیو سینا اب کانگریس کے ساتھ ہے، اس لیے وہ بی جے پی کی طرح ہندوتوا کو نہیں پیش کر سکتی۔

’مسلمان بی جے پی کے خلاف ووٹ دیتے ہیں، اس لیے شیو سینا کو کانگریس کے ساتھ مل کر فائدہ حاصل ہے اور اس سے مسلمانوں کے ووٹ حاصل کرنے کے امکانات بڑھ جاتے ہیں۔‘

مہاراشٹر میں 20 نومبر کو ووٹنگ ہوگی۔ اس سے پہلے بھارتیہ جنتا پارٹی اور ادھو ٹھاکرے کی شیو سینا پچھلے اسمبلی انتخابات میں ایک ساتھ تھیں۔

اب ادھو ٹھاکرے اور بی جے پی آمنے سامنے ہیں۔ بی جے پی سے علیحدگی کے بعد ادھو ٹھاکرے نے اپنی سیاسی حکمت عملی میں تبدیلی کی ہے اور مسلمانوں تک پہنچنے کی کوشش اسی نئی حکمت عملی کا حصہ ہے۔

ہم ممبئی کے نریمن پوائنٹ پر موجود تھے جہاں شیو سینا (ادھو بالا صاحب ٹھاکرے) کا ریاستی دفتر 'شیوالیہ' ہے۔

یہاں مہاراشٹر کے سابق وزیر اور این سی پی (شرد پوار گروپ) کے رہنما جیتیندر اوہاد صحافیوں سے گفتگو کر رہے تھے کہ اسی دوران کچھ مسلم کارکنوں نے جو کہ شیو سینا (یو بی ٹی) کے نشان پہنے ہوئے تھے، جیتیندر اوہاد کے ساتھ تصویریں کھینچنے شروع کر دیں۔

میرے ساتھ کھڑے ایک مقامی صحافی نے کہا: ’یہ شیو سینا اب بال ٹھاکرے کی شیو سینا نہیں رہی۔‘

ادھو ٹھاکرے کا ہندوتوا کا الگ نظریہ

رواں سال مئی میں لوک سبھا انتخابات کے دوران ادھو ٹھاکرے ممبئی کے چیمبور کے قریب چیتا کیمپ نامی علاقے میں پہنچے تھے جہاں مسلمانوں کی بڑی تعداد موجود ہے۔

ادھو نے یہاں مراٹھی کے بجائے ہندی زبان میں خطاب کیا۔ مسلم ووٹروں کے ہجوم کے سامنے ادھو کہتے ہیں: ’میں شاید پہلی بار آپ کے سامنے آیا ہوں کیونکہ ہمارے درمیان ایک دیوار تھی، ہم آپس میں لڑتے تھے۔ میں آپ سے ایک سوال پوچھتا ہوں، کیا میں نے ہندوتوا چھوڑ دیا ہے؟

راج ٹھاکرے کا طعنہ بی جے پی کے رہنما اور نائب وزیر اعلی دیویندر فڈنویس نے بھی دہرایا ہے۔

انھوں نے کہا: 'اگر ووٹ کی مجبوری کے تحت کوئی 'ہندو ہردے سمراٹ شیو سینا کے سربراہ بالا صاحب ٹھاکرے' کو 'جناب بالا صاحب ٹھاکرے' کہتا ہے تو ہم اسے برداشت نہیں کریں گے۔ ہم ووٹ کے لیے مجبور لوگ نہیں ہیں۔'

سینیئر صحافی جے دیو ڈولے کہتے ہیں: 'جب سے ادھو مہاوکاس اگھاڑی یا انڈیا الائنس میں شامل ہوئے ہیں، تب سے وہ سمجھ گئے ہیں کہ ہندوتوا کا مسئلہ علاقائی پارٹیوں کے لیے اب درست نہیں ہے۔

'پہلے ان کی پارٹی مسلمانوں اور بائیں بازو کے لوگوں کو گالی دیتی تھی لیکن اب ایسا نہیں ہے۔ اگر ہندوتوا کی سیاست ہی کرنی ہے تو لوگوں کے لیے بی جے پی بہترین آپشن بن گئی ہے۔'

مہاراشٹر میں تقریباً 12 فیصد مسلمان ووٹرز ہیں اور ممبئی میں مسلمانوں کی آبادی تقریباً 22 فیصد ہے۔

مسلمانوں کو ساتھ لے کر چلنے کی ادھو ٹھاکرے کی مہم کے بارے میں ان کی پارٹی کے سینیئر لیڈر انیل پرب کہتے ہیں: 'بالا صاحب کے وکیل، ڈاکٹر اور بہت سے لیڈر مسلمان تھے۔ بالا صاحب کبھی مسلمانوں کے خلاف نہیں تھے۔ انھوں نے کہا کہ انڈیا میں رہ کر پاکستان کے لیے زندہ آباد نہ کہیں اور ہمارا مسئلہ آج بھی وہی ہے۔ شیوسینا (یو بی ٹی) ہمیشہ بالا صاحب کے ہندوتوا پر آگے بڑھے گی۔'

سینیئر صحافی اور مصنف پرکاش اکولکر مسلمانوں کے شیو سینا کے ساتھ اکٹھے ہونے میں مہواکاس اگھاڑی کے کردار کو اہم سمجھتے ہیں۔

پرکاش اکولکر کہتے ہیں: '2024 کے انتخابات واضح طور پر منقسم تھے۔ یا تو آپ مودی کے ساتھ ہیں یا نہیں ہیں۔

93 992 میں بابری مسجد کے انہدام کے بعد ممبئی میں ہونے والے فسادات کے بعد مسلمانوں نے کبھی شیو سینا کو ووٹ نہیں دیا لیکن اس بار انھوں نے ووٹ دیا۔ اب لوک سبھا انتخابات کو چھ ماہ گزر چکے ہیں اور معاملات بھی بدل گئے ہیں۔'

یہ بھی پڑھیں: 19 Years Since the Devastating October 8 Earthquake: Balakot Survivors Still Lack Basic Amenities

کیا ادھو کا روایتی ووٹ بینک ان کے ہاتھ سے چلا جائے گا؟

کیا مسلمانوں کے ساتھ فیاضی کا شیو سینا کے ہندو ووٹ بینک پر کوئی اثر پڑ سکتا ہے؟

اس کے جواب میں سینیئر صحافی سدھیر سوریہ ونشی کہتے ہیں: 'ہندو ووٹ بینک جو جانا تھا وہ ایکناتھ شندے کے ساتھ چلا گیا ہے۔ جو لوگ سمجھتے ہیں کہ ادھو ٹھاکرے کا ہندوتوا درست ہے، وہ آج ادھو ٹھاکرے کے ساتھ ہیں۔ مسلم ووٹ بینک کی وجہ سے ادھو اگر کچھ لوک سبھا سیٹوں پر ادھو ٹھاکرے کو فائدہ ہوا ہے تو یہ ان کے حق میں ہے۔'

کئی مواقع پر بال ٹھاکرے مسلمانوں اور غداری کو جوڑتے ہوئے نظر آئے اور ایک بار تو انھوں نے مسلمانوں کو 'سبز زہر' بھی کہا تھا۔

تاہم پانچ سال قبل دسمبر 2019 میں ادھو ٹھاکرے نے بطور وزیر اعلیٰ مہاراشٹرا اسمبلی میں یہ تسلیم کیا کہ مذہب کو سیاست سے جوڑنا ان کی غلطی تھی اور اس کی وجہ سے انھیں نقصان اٹھانا پڑا تھا۔

اس سال ہونے والے لوک سبھا انتخابات میں ادھو ٹھاکرے نے ایک بھی مسلم امیدوار کھڑا نہیں کیا۔ اسمبلی انتخابات میں بھی انھوں نے صرف ایک مسلم امیدوار کو ٹکٹ دیا ہے اور ہارون خان ممبئی کی ورسووا سیٹ سے شیو سینا (یو بی ٹی) کے امیدوار ہیں۔

یہ بھی پڑھیں: جی ایچ کیو حملہ کیس؛ عمران خان کو چالان کی نقول فراہم، بانی پی ٹی آئی کا صحت جرم سے انکار

مسلم معاشرے کی رائے

سماجی کارکن زید خان کا کہنا ہے کہ کانگریس اور شیوسینا (یو بی ٹی) مسلم کمیونٹی کے ووٹ چاہتے ہیں لیکن ان کی نمائندگی نہیں چاہتے۔

زید خان کا کہنا ہے کہ ’بالا صاحب کے وقت ہم جانتے تھے کہ وہ مسلمانوں کے ووٹ نہیں چاہتے، لیکن ہمیں ادھو ٹھاکرے سے امیدیں تھیں۔ مسلمانوں نے لوک سبھا میں انھیں جوش و خروش سے ووٹ دیا لیکن پوری مہاوکاس اگھاڑی نے ایک بھی مسلم کو ٹکٹ نہیں دیا۔

'ہمیں اسمبلی انتخابات سے امیدیں وابستہ تھیں۔ مہاراشٹر میں 12 فیصد مسلمان ہیں۔ اس کے مطابق مسلمانوں کے لیے 36 سیٹیں بنتی ہیں لیکن انھوں نے اتنی سیٹیں نہیں دیں۔ بائیکلہ سیٹ پر 41 فیصد مسلمان ہیں، پھر بھی شیو سینا (یو بی ٹی) نے یہاں منوج جمسوتکر کو ٹکٹ دیا ہے۔'

آفاق احمد دھراوی کے ووٹر ہیں اور دھراوی میں رہتے ہیں اور صحافت کرتے ہیں۔

شیو سینا اور مسلم نمائندگی کے سوال پر آفاق کہتے ہیں: 'ہر پارٹی بی جے پی کی طرف سے بنائے گئے ہندوتوا کے ماحول سے خوفزدہ ہے۔ یہی وجہ ہے کہ شیوسینا بھی مسلمانوں کو ان کی آبادی کے حساب سے ٹکٹ نہیں دینا چاہتی۔ مسلم کمیونٹی دل سے ناراض ہے لیکن اسے لگتا ہے کہ نمائندگی نہ سہی کم از کم ہماری باتیں رکھنے والا تو ہونا چاہیے۔'

نسیم صدیقی مہاراشٹر اقلیتی کمیشن (2004-2011) کے چیئرمین رہ چکے ہیں اور این سی پی (شرد پوار) کے قومی ترجمان ہیں۔

ٹکٹوں کی تقسیم کے بارے میں ان کا ماننا ہے کہ شیوسینا سمیت دیگر پارٹیوں نے بھی مسلمانوں کو ان کے تناسب سے ٹکٹ نہیں دیے ہیں۔

نسیم صدیقی کہتے ہیں: 'شیو سینا نے ایک، شرد پوار نے دو اور کانگریس نے سات آٹھ مسلمانوں کو ٹکٹ دیا ہے۔ مسلم کمیونٹی میں ناراضگی ہے لیکن مسئلہ کسی نہ کسی طرح بی جے پی اتحاد کو روکنا ہے۔ مستقبل میں مختلف عہدوں پر مسلمانوں کا خیال رکھا جائے گا۔'

یہ بھی پڑھیں: لاہور میں سموگ کے ڈیرے ، آلودہ ترین شہروں میں پھر پہلے نمبر پر آ گیا

دونوں 'سیناؤں' کے لیے الیکشن کتنا اہم ہے؟

ممبئی میں شیو سینا کے ارد گرد انتخابات کی بحث کرتے ہوئے لوگوں کے درمیان ایک اہم سوال یہ اٹھ رہا ہے کہ 'اصل شیو سینا' کون ہے؟

جون 2022 میں، اکناتھ شندے کی قیادت میں شیوسینا کے ایک بڑے حصے نے باغی رویہ اختیار کیا اور وزیر اعلیٰ ادھو ٹھاکرے کے خلاف محاذ کھول دیا۔

ان ایم ایل اے نے دعویٰ کیا کہ مہاوکاس اگھاڑی اتحاد شیو سینا کے حقیقی نظریات کے خلاف ہے۔

شندے کے وزیر اعلی بنتے ہی شیوسینا کی اصل لڑائی شروع ہوئی، جو آج بھی جاری ہے۔

سینیئر صحافی سدھیر سوریاونشی نے کہا: 'اس وقت مہاراشٹر کے بہت سے لوگوں میں یہ پیغام پھیل چکا ہے کہ شندے والی شیو سینا چوری ہو گئی ہے۔ اصل شیو سینا کا فیصلہ اس اسمبلی الیکشن میں ہو جائے گا۔ اصل سچائی اب سامنے آ رہی ہے۔ سپریم کورٹ میں شیو سینا کا معاملہ زیر التوا ہے، لیکن جو بھی اس انتخابات میں بہتر کارکردگی دکھائے گا، عوامی عدالت میں اس پر حقیقی شیو سینا ہونے کی مہر لگ جائے گی۔'

فروری 2023 میں، الیکشن کمیشن نے شیو سینا کا نام اور ان کا انتخابی نشان 'تیر کمان' شندے دھڑے کو الاٹ کیا جبکہ ادھو ٹھاکرے کا کہنا تھا کہ شندے کے ایم ایل اے کو انحراف کی وجہ سے نااہل قرار دیا جانا چاہیے۔ فی الحال شیو سینا کا اصل معاملہ عدالت میں زیر التوا ہے۔

شیوسینا کے دو دھڑوں میں تقسیم ہونے کے بعد یہ پہلا اسمبلی الیکشن ہے۔ اس سے پہلے لوک سبھا انتخابات میں دونوں پارٹیاں آمنے سامنے آ چکی تھیں۔

پھر شندے کی شیو سینا نے 15 سیٹوں پر الیکشن لڑا اور سات سیٹیں جیتیں، جبکہ ادھو کی شیو سینا (یو بی ٹی) نے 21 سیٹوں پر الیکشن لڑا اور 9 سیٹیں جیتیں۔

دونوں پارٹیاں 13 سیٹوں پر آمنے سامنے تھیں، جن میں سات سیٹیں شیو سینا (یو بی ٹی) نے جیتیں جبکہ چھ سیٹیں شندے کی شیو سینا نے جیتیں۔

اب اسمبلی انتخابات میں ادھو اور شندے کی پارٹیاں 45 سے زیادہ سیٹوں پر آمنے سامنے ہیں، جن میں دونوں پارٹیوں کے امیدوار ممبئی میٹروپولیس کی 11 سے 12 سیٹوں پر ایک دوسرے کے خلاف کھڑے ہیں۔

اس کے علاوہ مراٹھواڑہ اور کونکن کی آٹھ، ودربھ کی چھ، شمالی مہاراشٹر کی چار اور مغربی مہاراشٹر کی چار سیٹوں پر ان کے امیدواروں کے درمیان سیدھا مقابلہ ہوگا۔

مہاراشٹر میں شیوسینا (یو بی ٹی) کے 94 امیدوار اور ایکناتھ شندے کی شیو سینا کے 78 امیدوار انتخابی نشان تیرکمان پر مقابلہ کر رہے ہیں۔

جب شیو سینا اور مسلم لیگ ایک ساتھ آئے

مسلم لیگ کے ساتھ اتحاد کا ذکر مصنف اور صحافی ویبھو پورندرے کی کتاب 'بال ٹھاکرے اینڈ رائز آف شیو سینا' میں کیا گیا ہے۔

ویبھو لکھتے ہیں: 'سنہ 1972-73 میں شیو سینا نے ممبئی میونسپل کارپوریشن کے انتخابات ریپبلکن پارٹی آف انڈیا (گوائی) کے ساتھ مل کر لڑا تھا۔ تاہم، شیو سینا میئر بننے کے لیے چند سیٹوں سے کم رہ گئی اور پھر شیو سینا نے مسلم لیگ سے حمایت حاصل کی اور اس کے بعد شیو سینا کے رہنما سدھیر جوشی ممبئی کے میئر بن گئے۔'

1970 کی دہائی کے آخر میں شیو سینا اور مسلم لیگ کے رہنما ایک بار پھر اسٹیج پر ایک ساتھ نظر آئے۔ ممبئی کے علاقے ناگ پاڑا میں دونوں جماعتوں کی میٹنگ ہوئی اور ادھو ٹھاکرے نے مسلم لیگ کے غلام محمود بنات والا کے ساتھ اسٹیج شیئر کیا۔

تب بال ٹھاکرے نے اپنی تقریر میں کہا تھا: ’اب سے شیوسینا اور مسلم لیگ اپنے منصفانہ حقوق کے لیے لڑیں گے۔'