روس کی نئی جوہری ہتھیاروں کی پالیسی میں کیا خاص باتیں شامل ہیں؟

روس پہلے ہی امریکہ اور دیگر یورپی ممالک کو ایٹمی حملے کے امکانات کے بارے میں خبردار کر چکا ہے۔

مارچ میں روس میں ہونے والے انتخابات سے قبل ہی پوتن نے کہا تھا کہ روس ایٹمی حملہ کرنے سے گریز نہیں کرے گا اور یہ کہ اگر امریکہ اپنی فوج یوکرین بھیجتا ہے تو معاملہ بہت بڑھ سکتا ہے۔

اگرچہ کوئی بھی ملک اپنے ہتھیاروں کی مکمل معلومات نہیں دیتا تاہم دستیاب اعداد و شمار ظاہر کرتے ہیں کہ سب سے زیادہ ایٹمی ہتھیار روس کے ہی پاس ہیں اور اندازوں کے مطابق ان کی تعداد تقریباً 5,977 ہے۔

یہ تعداد آج بھی امریکہ، برطانیہ، اور فرانس کے مشترکہ ایٹمی ہتھیاروں سے کچھ زیادہ ہے۔ ان میں کچھ ٹیکٹیکل ہتھیار بھی ہیں۔

ٹیکٹیکل ہتھیار چھوٹے جوہری ہتھیار ہوتے ہیں، جو ایک مخصوص علاقے کو نشانہ بنانے کے لیے بنائے جاتے ہیں۔ ان ٹیکٹیکل ہتھیاروں کو میزائل کے ذریعے فائر کیا جا سکتا ہے۔ کروز میزائل کی طرح، اس سے بہت زیادہ فاصلے تک کوئی تابکار نقصان نہیں پہنچتا اور ان میں ایک کلو ٹن تک جوہری دھماکہ خیز مواد ہو سکتا ہے۔ امریکہ نے ہیروشیما پر جو ایٹم بم گرایا وہ 15 کلو ٹن کا تھا۔

یہ ٹیکٹیکل ہتھیار آج تک کبھی کسی جنگ میں استعمال نہیں ہوئے۔

لیکن پوتن کے جوہری ہتھیاروں کے استعمال سے متعلق بیانات کو میڈیا اور مغرب میں بیان بازی کہا جاتا ہے، یعنی وہ صرف بولتے ہیں۔ تو اس بات کا کتنا اندیشہ ہے کہ جو کچھ وہ کہہ رہے ہیں وہ کریں گے بھی؟

بعض ماہرین کا خیال ہے کہ اگر روس کو مستقبل قریب میں بار بار ناکامی کا سامنا کرنا پڑتا ہے یا اپنی شکست کا خدشہ لگتا ہے تو وہ ٹیکٹیکل ہتھیار استعمال کر سکتا ہے۔ تاہم یہ ممکن ہے کہ چین روس کے کسی بھی اس نوعیت کے اقدام کی حمایت نہ کرے۔

روس متعدد معاملات میں چین پر بہت زیادہ انحصار کرتا ہے۔ چین کی جوہری پالیسی یہ ہے کہ وہ کبھی بھی جوہری ہتھیار پہلے استعمال نہیں کرے گا، اور اگر روس جوہری ہتھیار استعمال کرنے کا آپشن استعمال کرتا ہے تو ممکن ہے کہ چین اس کی حمایت نہ کرے۔

کچھ ماہرین اسے ایسے دیکھ رہے ہیں کہ پوتن جوہری ہتھیاروں سے متعلق اپنی نئی پالیسی سے سب کو دوبارہ پریشان کرنا چاہتے ہیں۔ اُن کا خیال ہے کہ پوتن اس کے ذریعے دنیا میں اپنا اثر و رسوخ بڑھانا چاہتے ہیں۔ امریکہ نے پوتن کی اس نئی پالیسی پر تنقید کی ہے لیکن ان کے بیان میں تشویش کی کوئی وجہ نہیں بتائی گئی۔