بھارت کے سپر سٹار رجنی کانت کی بیٹی کو طلاق ہو گئی

طلاق کی رسمی تصدیق

ممبئی (ڈیلی پاکستان آن لائن) جنوبی بھارت کے معروف تامل اداکار وینکاٹیش پرابھو کستوری راجہ المعروف دھنوش اور فلمساز ایشوریا رجنی کانت کے درمیان باضابطہ طور پر طلاق ہوگئی ہے۔ یاد رہے کہ 41 سالہ دھنوش کی ان دنوں ساؤتھ کی ایک اور معروف اداکارہ نین تارا کے ساتھ قانونی جنگ بھی جاری ہے۔

یہ بھی پڑھیں: وسیم اکرم کا بابراعظم کی کپتانی سے استعفیٰ پر دلچسپ رد عمل

فیملی کورٹ کا فیصلہ

بھارتی میڈیا اداروں کے مطابق چنئی کی فیملی ویلفیئر کورٹ نے سابق جوڑے کی جانب سے یہ بتانے کے بعد کہ آپس میں مفاہمت ممکن نہیں، دونوں کے درمیان طلاق کی منظوری دے دی۔ اس سے قبل اس کیس کی تین بار سماعت ہوئی لیکن دونوں (دھنوش اور ایشوریا رجنی کانت) پیشی پر حاضری میں ناکام رہے۔

خاندانی پس منظر

42 سالہ ایشوریا ساؤتھ کے سپر سٹار رجنی کانت کی بیٹی ہیں۔ یاد رہے کہ دونوں کی 2004 میں شادی ہوئی تھی اور ان کے دو بیٹے ہیں۔ طلاق کے باوجود دونوں چنئی کے علاقے پوئز گارڈن میں ایک دوسرے کے قریب ہی رہائش پذیر ہیں، اور دونوں بچوں کی مشترکہ طور پر پرورش کرتے ہیں جبکہ مستقل طور پر بیٹوں کے ساتھ سوشل میڈیا پر لمحات شیئر کرتے ہیں۔ دھنوش نے 17 جنوری 2022 کو طلاق کا اعلان کیا تھا۔