بیٹی کو بستر کی دراز میں تین سال تک چھپانے والی ماں: ’بچی کے اعضاء مڑے ہوئے اور جسم پر نشانات تھے‘

عدالت کو بتایا گیا کہ ننھی بچی اس قدر غذائی قلت کا شکار تھی کہ وہ تین سال کی بچی کی بجائے سات ماہ کے بچے جیسی لگ رہی تھی۔ بچی کو سرنج کے ذریعے دودھ والا ویٹا بکس کھلایا گیا تھا۔

عدالت کو یہ بھی بتایا گیا کہ ’اس دوران بچی کا تالو بھی ٹوٹ گیا تھا اور اسے کئی دیگر طبی مسائل کا سامنا تھا۔ تاہم بچی کی والدہ نے علاج پر توجہ نہیں دی۔‘

بچی کے ساتھ 2020 کے اوائل سے 2023 تک یہ سب ہوتا رہا۔

بچی کی موجودگی کا انکشاف تب ہوا جب گھر آنے والے ایک مہمان کو اوپر کمرے سے رونے کی آواز آئی اور یوں بچی بیڈ سے ملی۔

بچی کو ملنے پر ایک سماجی کارکن کو گھر بلایا گیا جس نے سونے کے کمرے میں داخل ہونے پر جو کچھ دیکھا اسے خوفناک دھچکہ قرار دیا۔

’وہ بچی الجھے اور بے ترتیب بالوں، مڑے ہوئے اعضا اور جسم پر بے تحاشا نشانات کے ساتھ ملی۔‘

سماجی کارکن نے بچی کی ماں کی طرف دیکھا اور بے یقینی سے پوچھا کہ ’کیا آپ اسے یہیں رکھتی ہیں؟‘ جس پر ماں نے حقیقت پسندی سے جواب دیا، ’ہاں، یہیں دراز میں۔‘

’میں حیران رہ گیا کہ ماں نے کسی جذبے کا اظہار نہیں کیا۔ مجھے یہ سوچ کر جھرجھری آ گئی کہ اس بچی نے اپنی ماں کے علاوہ شاید واحد دوسرا چہرہ میرا دیکھا تھا۔‘

عدالت کو بچی کی نشوونما کے سنگین مسائل کے بارے میں آگاہ کیا گیا جو نظر انداز کرنے کے نتیجے میں درپیش تھے۔

یہ بچی اب دیکھ بھال کے ادارے کے سپرد کی گئی ہے۔

’46 سال کے دوران اتنے برے مقدمے کا سامنا نہیں کیا‘

پولیس کی تفتیش کے دوران بچی کی ماں نے بتایا کہ وہ اپنے حاملہ ہونے کے بارے میں نہیں جانتی تھی اور بچی کو جنم دیتے وقت تک وہ خوفزدہ تھی۔

خاتون کے مطابق وہ بچی کو ہروقت بستر کے نیچے دراز میں نہیں رکھتیں تھیں اور نہ ہی دراز کبھی مکمل بند کرتی تھیں۔

انھوں نے تفتیشی افسران کو بتایا کہ بچی ان کے خاندان کا حصہ نہیں۔

ماں نے آنسو پونچھتے ہوئے بتایا کہ انھوں نے اپنے دوسرے بچوں کی اچھی طرح دیکھ بھال کی تاہم وہ اب ان کے ساتھ نہیں رہتے۔

جج ایورٹ نے ریمارکس میں کہا کہ ’آپ اس صورتحال کو جتنی خاموشی سے دبا سکتی تھیں وہ آپ نے کیا لیکن اتفاق سے آپ کا خوفناک راز دنیا کے سامنے آ گیا۔‘

جج نے مزید کہا کہ ’مجھے یاد نہیں کہ 46 سال کے دوران میں نے اتنے برے مقدمے کا سامنا کیا ہو۔‘