جنوبی وزیرستان اور لکی مروت میں سیکیورٹی فورسز کے آپریشنز ، 8 خوارج جہنم واصل ، 2 گرفتار

سیکیورٹی فورسز کی کامیاب کارروائیاں

راولپنڈی (ڈیلی پاکستان آن لائن) 05 دسمبر کو صوبہ خیبرپختونخوا میں سیکیورٹی فورسز کی جانب سے کیے گئے 2 الگ الگ آپریشنز میں 8 خوارج کو جہنم واصل کر دیا گیا۔

یہ بھی پڑھیں: کراچی کی ڈاکٹر کا مثالی اقدام، انتقال کرنے والے بیٹے کے گردے عطیہ کردیے۔

جنوبی وزیرستان میں آپریشن

آئی ایس پی آر کے مطابق خوارج کی موجودگی کی اطلاع پر جنوبی وزیرستان کے علاقے سراروغہ میں انٹیلی جنس کی بنیاد پر آپریشن کیا گیا۔ آپریشن کے دوران، سیکیورٹی فورسز نے خوارج کے مقام پر مؤثر انداز میں کارروائی کی جس کے نتیجے میں خوارج کے سرغنہ خان محمد کھوری سمیت 2 خوارج مارے گئے، جب کہ 2 خوارج کو گرفتار کر لیا گیا۔

مارا گیا خارجی خان محمد کھوری علاقے میں ٹارگٹ کلنگ اور بھتہ خوری سمیت دہشت گردی کی متعدد کارروائیوں میں ملوث تھا۔ وہ قانون نافذ کرنے والے اداروں کو انتہائی مطلوب تھا اور حکومت نے اس پر 1 ملین کی ہیڈ منی بھی مقرر کی تھی۔

یہ بھی پڑھیں: انٹربینک میں ڈالر 1روپے 22پیسے، اوپن مارکیٹ میں 2روپے سستا

لکی مروت میں کارروائی

آئی ایس پی آر کے مطابق ایک اور انٹیلی جنس پر مبنی آپریشن ضلع لکی مروت میں کیا گیا اور شدید فائرنگ کے تبادلے کے بعد سیکیورٹی فورسز نے 6 خوارج کو کامیابی سے بے اثر کر دیا۔

دہشت گردی کا خاتمہ

آئی ایس پی آر کے مطابق علاقے میں پائے جانے والے کسی اور خارجی کو ختم کرنے کے لیے کارروائیاں کی جا رہی ہیں، کیونکہ پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔