زینبیون اور تحریک طالبان: کیا بیرون ملک تربیت حاصل کرنے والے جنگجوؤں کا کرّم میں ہونے والے فرقہ وارانہ فسادات سے کوئی تعلق ہے؟

پاکستان میں صوبہ خیبر پختونخوا کے ضلع کرم کو پاکستان کے قدیم ترین قبائلی علاقوں میں شمار کیا جاتا ہے۔ اس علاقے کی باقاعدہ آبادکاری 1890 کی دہائی میں برطانوی دور حکومت کے دوران کی گئی۔ اس کے بعد یہاں زمینوں کی تقسیم کا عمل شروع ہوا، جس کے ساتھ مقامی قبائل کے درمیان تنازعات بھی جنم لینے لگے۔ اگرچہ یہاں کے مقامی قبائل کے درمیان تنازعات کی تاریخ ایک صدی سے زیادہ پرانی ہے، لیکن رواں برس جولائی سے یہ علاقہ خونریز جھڑپوں اور فرقہ وارانہ حملوں کی وجہ سے مسلسل خبر کی زینت بنا ہوا ہے۔

صرف سنہ 2024 کے دوران ضلع کرم کے مختلف علاقوں میں پرتشدد واقعات میں 200 سے زیادہ افراد ہلاک ہو چکے ہیں، جن میں خواتین اور بچے بھی شامل ہیں۔

امن و امان کی یہ خراب صورتحال مزید سنگین ہوتی نظر آتی ہے جب حکام کی جانب سے ایسی شدت پسند تنظیموں اور افراد کے ملوث ہونے کے دعوے کیے جاتے ہیں جو پاکستان سے باہر بھی کارروائیوں میں شامل رہے ہیں۔

کرم میں مسافر گاڑیوں کے قافلے پر ہونے والے حملوں اور قبائلی لشکروں کی جانب سے متعدد مقامات پر لشکر کشی اور آتشزنی کے واقعات کے بعد، پاکستان کے وزیر دفاع خواجہ آصف نے کہا کہ ’یہ فرقہ وارانہ جھگڑا پاڑہ چنار سے باہر آ رہا ہے، جس کی باقاعدہ پشت پناہی افغانستان سے ہو رہی ہے اور طالبان سرحد پار کر رہے ہیں۔‘

سوشل میڈیا پر ایسی ویڈیوز بھی منظر عام پر آئیں جن میں ایک چیک پوسٹ پر پاکستان کے پرچم کی جگہ کالعدم تنظیم زینبیون کا جھنڈا نصب دیکھا گیا۔

یاد رہے کہ ضلع کرم میں 21 نومبر کو گاڑیوں کے قافلے پر ہونے والے حملے میں 50 سے زیادہ افراد ہلاک ہوئے، جن میں سے بیشتر کا تعلق شیعہ مکتبہ فکر سے تھا۔ اس سے پہلے اکتوبر میں کُرم میں سُنّی قبائل کے مسافروں کے قافلے پر بھی حملہ کیا گیا تھا، جس میں 16 افراد کی ہلاکت ہوئی، جن میں خواتین اور بچے بھی شامل تھے۔

21 نومبر کے واقعے کے اگلے روز، مسلح لشکر نے ضلع کُرم میں سُنّی آبادی والے علاقے بگن پر حملہ کیا، جہاں سینکڑوں دکانیں اور مکانات کو آگ لگا دی گئی۔ حکام کے مطابق، اس حملے میں 32 افراد ہلاک ہوئے۔

سنی اور شیعہ شدت پسندوں کی کرم میں موجودگی پر حکام کیا کہتے ہیں؟

جب Uses in Urdu نے کرم کی لڑائی میں شدت پسند عناصر کے کردار کے بارے میں سیکیورٹی حکام سے بات کی، تو انہوں نے دعویٰ کیا کہ دونوں طرف کے شدت پسند تنظیموں کے جنگجو بھی شامل ہیں جو غیرملکی تنازعات کا حصہ رہے ہیں۔

حکام کا کہنا ہے کہ کُرم میں جاری تنازع میں کالعدم تنظیموں زینبیون، تحریکِ طالبان پاکستان (ٹی ٹی پی)، داعش، لشکرِ جھنگوی، سپاہ صحابہ اور سپاہ محمد کے عناصر بھی ملوث ہیں۔

ماضی میں پاکستان کے مختلف حصوں میں تعینات رہنے والے اور شدت پسندوں کے خلاف متعدد کارروائیوں میں شامل رہنے والے ایک سیکیورٹی افسر نے Uses in Urdu سے کہا کہ ’شام، عراق اور افغانستان میں تنازعات کی وجہ سے مقامی سطح پر بھی تشدد میں اضافہ ہوا ہے۔‘

حاضر سروس سیکیورٹی اہلکار نے Uses in Urdu سے اپنا نام نہ ظاہر کرنے کی درخواست کی ہے کیونکہ انہیں میڈیا سے بات کرنے کی اجازت نہیں ہے۔

ان کا کہنا ہے کہ ’نہ صرف ان (غیرملکی) تنازعات میں حصہ لینے والے جنگجوؤں نے کُرم میں اپنی مہارت دکھائی ہے بلکہ انھوں نے جدید اسلحے کا استعمال بھی کر کے دکھایا ہے۔‘

یہ بھی پڑھیں: گرمی سے ستائے پاکستانیوں کیلئے خوشخبری آ گئی

کیا طالبان اِن فسادات میں ملوث ہیں؟

ضلع کُرم سے تعلق رکھنے والے افراد اپنے علاقوں میں کالعدم تنظیموں سے جُڑے افراد کی موجودگی کی تصدیق تو کرتے ہیں لیکن ساتھ ہی وہ پرتشدد واقعات کا الزام بھی ایک دوسرے پر لگاتے ہوئے نظر آتے ہیں۔

ضلع کُرم کے علاقے باگزئی سے تعلق رکھنے والے بلدیاتی نمائندے محمد ریاض نے Uses in Urdu کو بتایا کہ وسطی کُرم میں ٹی ٹی پی کی موجودگی ضرور ہے لیکن ’یہ بہت محدود ہے۔‘ تاہم محمد ریاض نے دعویٰ کیا کہ شیعہ علاقوں سے ہزاروں کی تعداد میں لوگ لشکر کشی کرتے ہیں ’اُن کو کون روکے گا؟‘

بگن کے قریب واقع ایک گاؤں سے تعلق رکھنے والے معلم بھی اپنے علاقوں میں کالعدم تنظیموں کے حامیوں کی موجودگی کی تصدیق کرتے ہوئے نظر آتے ہیں۔

ان کا کہنا ہے کہ ’خود کو زینبیون اور طالبان سے منسوب کرنے والے لوگ اسلام کی مقدس ہستیوں کے لیے ہتک آمیز زبان استعمال کرتے ہیں اور ایک دوسرے کو گالیاں بھی دیتے ہیں۔‘ وہ کہتے ہیں کہ ان چیزوں کو دیکھ کر پھر مقامی لوگ بھی مشتعل ہو جاتے ہیں اور اُن کے خیال میں اکتوبر میں کونج علیزئی میں مسافر ویگن پر اور نومبر میں لوئر کُرم کے علاقوں بگن اور اوچت میں مسافر بسوں پر ہونے والے حملوں کی وجہ بھی یہی ہے۔

اُن کے مطابق لوئر اور وسطی کرم میں فوجی آپریشن ہو چکے ہیں اور ایسے ہی آپریشن کی ضرورت اپر کُرم میں بھی ہے۔

حالیہ عرصے میں کُرم میں تعینات رہنے والے ایک اعلیٰ افسر نے افغانستان کے سرحدی علاقوں کی طرف اشارہ کرتے ہوئے کہا کہ ’ان (سُنّی قبائل) کی جانب سے لڑنے کے لیے بھی اُدھر سے لوگ اِدھر آ جاتے ہیں۔‘ تاہم ان کا کہنا تھا کہ ’اُدھر سے آنے والے لوگوں کی آمد سے فریقین کی طاقت پر فرق تو پڑتا ہے لیکن یہاں یہ بھی یاد رکھنے کی ضرورت ہے کہ یہ جو سارا علاقہ ہے، اس علاقے میں رہنا والا ہر بندہ فائر بھی کر سکتا ہے اور ہر قسم کا اسلحہ چلانا جانتا ہے۔‘

پاکستان اور افغانستان میں شدت پسند گروہوں پر گہری نظر رکھنے والے تجزیہ کار عبدالسید کہتے ہیں کہ افغان طالبان کا کُرم میں اہل تشیع فرقے کے خلاف جنگ ’براہِ راست ملوث ہونا‘ مشکل ہے کیونکہ ’پاکستان خصوصاً کرم جیسے سرحدی علاقوں میں شیعہ سنی فرقہ وارانہ فسادات افغانستان میں دونوں فرقوں پر براہ راست اثر ڈال سکتے ہیں۔‘

’اگر ایسا کوئی اقدام ہوتا ہے تو یہ افغانستان کے ایران کے ساتھ تعلقات پر منفی اثر ڈال سکتا ہے، جو افغان طالبان کے لیے کسی طور قابل قبول نہیں ہو گا۔‘

تاہم عبدالسید کہتے ہیں کہ ضلع کُرم میں منگل، مقبل اور زادران جیسے سُنی قبائل بھی موجود ہیں اور ان سے تعلق رکھنے والے افراد افغانستان میں بھی رہائش پزیر ہیں۔

’جب کُرم میں اہل تشیع لشکر کی جانب سے سنی قبائل کے گھروں کو جلانے، بعض افراد کے ہلاک کرنے، ان کی ویڈیوز سوشل میڈیا پر آنے اور ان کے عورتوں کو ساتھ لے جانے کی خبریں سامنے آتی ہیں، تو قبائلی روایات کے مطابق سرحد پار موجود ان قبائل کا اپنے ہم قبیلہ یا عزیز و اقارب کے انتقام میں اس تنازع میں شامل ہونا بعید از قیاس نہیں ہے۔‘

عبدالسید مزید کہتے ہیں کہ افغانستان کی سرحد میں بسنے والے قبائل میں افغان طالبان کے جنگجو اور کمانڈر بھی شامل ہیں ’جن کے قریبی تعلقات کُرم میں موجود سُنی قبائل سے ہیں اور اسی سبب کُرم میں جاری شیعہ، سُنّی تنازع مزید پیچیدہ ہو جاتا ہے۔‘

یاد رہے کہ 22 نومبر کو ٹی ٹی پی کے ترجمان نے ایک بیان میں اہل تشیع افراد کے قافلے پر حملے میں ملوث ہونے کی تردید کی تھی۔ تاہم کالعدم گروہ کی جانب سے 24 نومبر کو ایک اور بیان جاری کیا گیا تھا جس میں بگن کے علاقے میں سُنّی قبائل پر حملے کی مذمت کی گئی تھی۔

چند مہینے قبل تک کُرم میں تعینات رہنے والے ایک پولیس افسر نے نام نہ ظاہر کرنے کی شرط پر Uses in Urdu کو بتایا کہ علاقے میں بھاری اسلحے کی موجودگی ان کے لیے ایک بڑا مسئلہ بنا ہوا ہے اور وہ اس کے لیے پڑوسی ملک افغانستان کو موردِ الزام ٹھہراتے ہیں۔

ان کا کہنا تھا کہ ’آپ کو پتا ہے کہ سرحد کے پار کون موجود ہے اور وہاں کیا کیا ہوتا رہا ہے تو اس کے کچھ تو نقصانات ہوں گے۔ جو حالیہ انخلا ہوا ہے امریکی افواج کا تو وہاں سے بھی شدت پسندوں کے خلاف اسلحہ لگا ہے۔ دونوں فریقین کے پاس جدید اسلحہ ہے۔‘

پاکستان کے قبائلی علاقوں پر گہری نظر رکھنے والے اور خراسان ڈائری سے منسلک تجزیہ کار افتخار فردوس کہتے ہیں کہ جب 2007 میں سُنّی کالعدم تنظیموں اور ٹی ٹی پی نے ضلع کُرم میں قدم جمانے کی کوشش کی تو مقامی شیعہ رہنما حاجی حیدر کی قیادت میں مسلح اہل تشیع لشکر نے انھیں شکست دی۔

افتخار فردوس کہتے ہیں کہ حاجی حیدر کا شمار پاسدارانِ انقلاب کی القدس فورس کے سابق سربراہ قاسم سلیمانی کے قریبی ساتھیوں میں ہوتا تھا۔

یہ بھی پڑھیں: گیس کی قیمت بڑھانے کی منظوری دے دی گئی

زینبیون کیا ہے اور کیا کرم فسادات میں اس کا کوئی کردار ہے؟

زینبیون بریگیڈ کے بارے میں عام خیال یہی ہے کہ یہ مسلح گروہ شیعہ پاکستانی جنگجوؤں پر مشتمل ہے جو شام میں خانہ جنگی کے دوران ایران کے اتحادی بشار الاسد کی حمایت میں لڑ رہا تھا اور انھیں عراق اور شام میں مقدس مقامات کی حفاظت کی ذمہ داری بھی سوپنی گئی تھی۔

دوسری جانب ایران بھی زینبیون بریگیڈ سے اپنے تعلق کو خفیہ نہیں رکھتا اور ایرانی سرکاری میڈیا بشمول پاسدارانِ انقلاب سے منسلک تسنیم نیوز ایجنسی بھی شام اور عراق میں مارے جانے والے پاکستانی جنگجوؤں کی خبریں اور کہانیاں نشر کرتا رہتا ہے۔

ضلع کُرم کے علاقے باگزئی سے تعلق رکھنے والے بلدیاتی نمائندے محمد ریاض کا کہنا ہے کہ ’زینبیون بھی طالبان کی طرح کالعدم تنظیم ہے پھر اُن کے خلاف ویسی ہی کارروائی کیوں نہیں ہوتی؟ وہاں لوگوں کے پاس ایسے اسلحہ ہے جو شاید پولیس کے پاس بھی نہ ہو۔‘

کُرم سے تعلق رکھنے والے سابق رُکن قومی اسمبلی ساجد حسین طوری دعویٰ کرتے ہیں کہ ’ماضی میں ہمارے علاقے کے لڑکے شام میں داعش کے خلاف لڑنے جاتے رہے ہیں اور وہ سب مقامی افراد ہیں۔ یہاں کوئی عربی یا فارسی شہری موجود نہیں۔‘

تاہم وہ کُرم میں زینبیون کی منظم موجودگی کی تردید کرتے ہیں اور کہتے ہیں کہ اُن کے علاقوں میں شیعہ قبیلوں پر حملوں میں داعش (نام نہاد دولتِ اسلامیہ) اور دیگر افغان گروہ ملوث ہیں۔