لڑکی والوں سے بدتمیزی، کھانے کے بعد دولہا خالی ہاتھ واپس، دلہن کی کزن سے شادی کردی گئی

وزیر آباد میں دلہن کی شادی کا انوکھا واقعہ

وزیرآباد (ویب ڈیسک) وزیر آباد میں لڑکی والوں سے بدتمیزی کرنے والے دولہا کو کھانے کے بعد بارات سمیت خالی ہاتھ واپس روانہ کردیا گیا اور دلہن کی شادی اس کے کزن کے ساتھ کردی گئی۔

شادی کی تقریب کی تفصیلات

تفصیلات کے مطابق علی پورچٹھہ کے نواحی علاقہ ورپال چٹھہ کے رہائشی فخر زمان چٹھہ نے اپنے ہمسایہ ڈاکٹر بلال احسن ہنجرہ سے اپنی بیٹی کی شادی طے کی، دونوں ہی خاندان زمیندار تھے تاہم دولہا ڈاکٹر بلال کا بیرون ملک کاروبار ہے۔ گزشتہ روز علی پورچٹھہ کے نجی میرج ہال میں شادی کی تقریب کا انتظام تھا جہاں علاقہ بھر سے لوگوں کی کثیر تعداد کو مدعو کیا گیا تھا۔

بارات کی آمد اور تنازعہ

مقامی میڈیا ذرائع کے مطابق بارات شادی ہال پہنچی تو باراتیوں نے بینڈ باجے پر ڈانس کرتے ہوئے دولہا پر لاکھوں روپے نچاور کیے، تاہم بارات کے استقبالیہ پر خواتین کی آپس میں تلخ کلامی ہوگئی اور سخت الفاظ کا تبادلہ ہونے پر معاملات گالم گلوچ تک پہنچ گئے۔

کھانے کے بعد انکار

جب بارات نے کھانا کھا لیا تو دلہن والوں نے نکاح سے انکار کردیا۔ لڑکی والوں نے مؤقف اپنایا کہ 'آپ لوگوں کا رویہ نکاح سے پہلے ہی نامناسب ہے تو شادی کے بعد لڑکی کے ساتھ کیسا سلوک ہوگا۔' انہوں نے اس بناء پر نکاح نہ کرنے کا فیصلہ کیا۔

خالی ہاتھ واپس لوٹنے کا واقعہ

اس صورتحال کے بعد دولہا ڈاکٹر بلال مایوس اور ناکام واپس لوٹ گیا جبکہ لڑکی کے والد نے اپنی بیٹی کا نکاح شادی میں شرکت کے لیے آنے والے دلہن کے ماموں زاد سے کروادیا۔ انہوں نے دلہن کے ماموں زاد کے ساتھ نکاح کرکے کروڑوں روپے مالیت کی قیمتی گاڑی بھی دی۔