پنجاب یونیورسٹی میں سینیئر صحافی سلمان غنی کے اعزاز میں تقریب، مثبت صحافت کو فروغ دینے کی ضرورت پر زور

پنجاب یونیورسٹی میں تقریب کا انعقاد

لاہور (ڈیلی پاکستان آن لائن) پنجاب یونیورسٹی کے وائس چانسلر پروفیسر ڈاکٹر محمد علی نے کہا کہ پاکستان وسائل سے محروم ملک نہیں، بلکہ اس کا مستقبل روشن ہے۔ تاہم ملک میں مثبت سوچ کو فروغ دینے کے لیے مثبت صحافت کی اشد ضرورت ہے۔ وہ الرازی ہال میں سکول آف کمیونیکیشن سٹڈیز کے زیرِ اہتمام معروف صحافی سلمان غنی کو ستارہ امتیاز ملنے پر منعقدہ خصوصی تقریب سے خطاب کر رہے تھے۔

یہ بھی پڑھیں: گھریلو ملازمہ گھر سے 20 لاکھ روپے اور 20 تولے سونا چرا کر فرار

محفل میں موجود شخصیات

تقریب میں برطانوی پارلیمنٹ کے رکن افضل خان، سینئر صحافی مجیب الرحمان شامی، سجاد میر، صدر لاہور پریس کلب ارشد انصاری، تجزیہ کار سلمان عابد، اینکر پرسن اجمل جامی، سلمان غنی کے اہل خانہ، ایس سی ایس کی ڈائریکٹر پروفیسر ڈاکٹر عابدہ اشرف، مختلف شعبہ جات کے سربراہان، اساتذہ اور بڑی تعداد میں طلبا و طالبات نے شرکت کی۔

یہ بھی پڑھیں: خواتین کا غیر ملکی سیاحوں کے ساتھ عارضی شادی کا انکشاف انڈونیشیا کے دیہات میں

ڈاکٹر محمد علی کی رائے

ڈاکٹر محمد علی نے کہا کہ ہمیں خوشی ہے کہ سلمان غنی جیسے محب وطن اور مثبت سوچ رکھنے والے صحافی پنجاب یونیورسٹی سے وابستہ رہے ہیں۔ ان کا کہنا تھا کہ مجیب الرحمان شامی اور سلمان غنی نے ہمیشہ حقائق پر مبنی صحافت کی ہے اور آج کی اس تقریب سے طلبا کو کئی سمسٹروں جتنا سیکھنے کا موقع ملا۔

یہ بھی پڑھیں: بابراعظم کیلئے بڑی شخصیات نے آوازیں بلند کر دیں

افضل خان کا پیغام

رکن برطانوی پارلیمنٹ افضل خان نے کہا کہ انہوں نے غزہ میں ہونے والے مظالم پر وزارت قربان کی اور مسلمانوں کی آواز بلند کرنا اپنا فرض سمجھا۔ انہوں نے کہا کہ ہر انسان میں اللہ تعالیٰ نے صلاحیت رکھی ہے، اور اگر نوجوان اپنی ذمہ داریاں ایمانداری سے ادا کریں تو پاکستان مضبوط ہوگا۔ ان کا کہنا تھا کہ مصنوعی ذہانت کے دور میں سچ اور جھوٹ میں فرق کرنا مشکل ہوتا جا رہا ہے۔

یہ بھی پڑھیں: وی پی این کے بغیر آئی ٹی انڈسٹری نہیں چل سکتی، چیئرمین پی ٹی اے

مجیب الرحمان شامی کی باتیں

مجیب الرحمان شامی نے اپنے خطاب میں کہا کہ صحافت میں سلمان غنی جیسا صحافی شاذ و نادر ہی ملتا ہے جو دیانت داری کے ساتھ رپورٹنگ کرتا ہے۔ انہوں نے کہا کہ دوسروں کی توہین کرنا صحافت نہیں بلکہ مثبت تنقید ہی اصل صحافت ہے۔ ان کا کہنا تھا کہ سوشل میڈیا پر ذمہ داری کا فقدان ہے اور سچائی کی کمی ہے۔

یہ بھی پڑھیں: سونے کی فی تولہ قیمت میں بڑا اضافہ

سلمان غنی کا اعزاز

سلمان غنی نے تقریب سے خطاب کرتے ہوئے کہا کہ ان کا یہ اعزاز پنجاب یونیورسٹی کے عظیم اساتذہ جیسے وارث میر، مغیث الدین شیخ، ڈاکٹر مہدی حسن اور دیگر کی تربیت کا نتیجہ ہے۔ انہوں نے کہا کہ وہ اپنے ساتھیوں مجیب الرحمان شامی اور سجاد میر سے بہت کچھ سیکھتے رہے۔ ان کا کہنا تھا کہ محنتی لوگ ذہین لوگوں سے زیادہ آگے جاتے ہیں۔

یہ بھی پڑھیں: وزیراعلیٰ پنجاب کے جیل ریفارمز ایجنڈا پر عملدرآمد جاری، 7 افسران کی بطور سپرنٹنڈنٹ گریڈ 18 میں ترقی

پاکستان کی عالمی حیثیت

انہوں نے افضل خان کو وزارت چھوڑنے پر خراج تحسین پیش کیا اور کہا کہ فلسطین پر مسلم دنیا کی خاموشی افسوسناک ہے، لیکن وہ دن دور نہیں جب فلسطین اسرائیل کا قبرستان بنے گا۔ انہوں نے وزیر اعظم شہباز شریف کی اقوامِ متحدہ میں اسرائیل کے خلاف جرات مندانہ تقریر کو سراہا اور کہا کہ پاکستانی وفد کا نیتن یاہو کی تقریر کا بائیکاٹ قابلِ تحسین اقدام تھا۔

یہ بھی پڑھیں: مقبوضہ کشمیر اسمبلی میں خصوصی حیثیت کی بحالی کی قرارداد منظور

معاشی بہتری کی امیدیں

سلمان غنی نے کہا کہ ہمارے پاس ایک ہاتھ میں ایٹم بم اور دوسرے ہاتھ میں کشکول ہے لیکن اب ملکی معیشت تیزی سے بہتر ہو رہی ہے۔ انہوں نے امید ظاہر کی کہ پاکستان کا نوجوان طبقہ دشمن کے پروپیگنڈے کا سوشل میڈیا پر بھرپور جواب دے گا۔

یہ بھی پڑھیں: سود کا خاتمہ اور مدارس کی رجسٹریشن، جامعہ اشرفیہ لاہور کے علماء کی مولانا فضل الرحمٰن کو مبارکباد

ساتھی صحافیوں کی رائے

سجاد میر نے کہا کہ سلمان غنی کسی سیاسی جماعت کا آلہ کار نہیں بلکہ ان کے تعلقات سب سے مضبوط ہیں۔ سلمان عابد نے کہا کہ سلمان غنی کی صحافتی کامیابیوں کے پیچھے ایک طویل اور مشکل سفر ہے۔ لاہور پریس کلب کے صدر ارشد انصاری نے موجودہ دور میں اخبارات و رسائل کے مطالعے کے رجحان کے خاتمے پر افسوس کا اظہار کیا اور طلبا کو پڑھنے کے عمل کو جاری رکھنے کی تلقین کی۔ اجمل جامی نے کہا کہ سلمان غنی صحافت کی دنیا کے بڑے ناموں میں سے ایک ہیں، اور ہمیں ان جیسے صحافیوں کی پیروی کرنی چاہیے۔ ڈاکٹر عابدہ اشرف کا کہنا تھا کہ سلمان غنی نے نہ صرف شعبہ صحافت کا نام روشن کیا بلکہ فلسطین اور مقبوضہ کشمیر میں مظالم کے خلاف بھی بھرپور آواز اٹھائی۔

تقریب کے اختتام پر تحائف کی تقسیم

تقریب سے ڈاکٹر نوشینہ سلیم، ڈاکٹر سویرا شامی، ڈاکٹر لبنیٰ ظہیر، ڈاکٹر میاں حنان احمد، ڈاکٹر عائشہ اشفاق اور ڈاکٹر فائزہ لطیف نے بھی خطاب کیا۔ آخر میں مہمانوں میں یادگاری شیلڈز تقسیم کی گئیں。