اس بار ملتان سلطانز کی حکمت عملی کیا ہوگی؟ اسامہ میر نے بتادیا

ملتان سلطانز کے آل راؤنڈر اسامہ میر کا عزم

کراچی(ڈیلی پاکستان آن لائن) پاکستان سپر لیگ (پی ایس ایل) کی ٹیم ملتان سلطانز میں شامل آل راؤنڈر اسامہ میر دسویں ایڈیشن میں بولنگ، بیٹنگ اور فیلڈنگ میں بھی نمایاں کردار دکھانے کیلئے پرعزم ہیں۔ جیو نیوز سے گفتگو کرتے ہوئے اسامہ میر نے کہا کہ پی ایس ایل کیلئے اچھی تیاریاں ہوئی ہیں، ٹیم نے کراچی کی کنڈیشنز کو مد نظر رکھتے ہوئے پلاننگ کی ہے، امید ہے کامیابی کے ساتھ اپنی مہم کا آغاز کریں گے۔

یہ بھی پڑھیں: کیا خراب پڑوسیوں کے تعلقات بھارت کو افغان طالبان کی طرف دھکیل رہے ہیں؟

فائنل میں کامیابی کی امید

جب اسامہ میر سے پوچھا گیا کہ پچھلے 3 مسلسل فائنل ہارنے کے بعد اس بار کامیابی کیلئے ملتان سلطانز کو کیا مختلف کرنا ہوگا؟ اس کے جواب میں اسامہ میر نے کہا کہ اس بار فائنل میں آئے تو پہلی کوشش ہوگی کہ میچ آخری گیند تک نہ جائے، امید ہے کہ اس بار فائنل میں آ کر ٹائٹل ضرور جیتیں گے۔ اپنی کارکردگی پر بات کرتے ہوئے اسامہ میر نے بتایا کہ ’پچھلے 2 سیزن میں بڑی اچھی پرفارمنس رہی، کوشش ہوگی کہ اس سلسلے کو جاری رکھوں، اپنی کارکردگی میں پہلے سے زیادہ بہتری لانا میرا عزم ہے۔ کوشش ہوگی کہ پی ایس ایل 10 میں اپنے تجربے کی مدد سے ٹیم کو بولنگ سے میچز جتواؤں۔

یہ بھی پڑھیں: ہمارا مقصد سیاسی نظام میں اصلاحات لانا ہے، سینیٹر عرفان صدیقی

پی ایس ایل اور قومی ٹیم کے مواقع

ایک سوال پر انہوں نے کہا کہ پاکستان سپر لیگ سب سے اہم ٹورنامنٹ ہے، یہاں کی پرفارمنس پلیئرز کو انٹرنیشنل کرکٹ کھیلنے میں مدد دیتی ہے، نوجوانوں کو سامنے آنے کا موقع ملتا ہے تو سینئرز کیلئے بھی کم بیک کا چانس ہوتا ہے، میری بھی کوشش ہوگی کہ پی ایس ایل کے اس پلیٹ فارم سے فائدہ اٹھاؤں۔ قومی ٹیم میں موقع نہ ملنے کے حوالے سے اسامہ میر نے کہا کہ ’چانس نہ ملنے پر حوصلہ نہیں گراتا، سپورٹس یہی سکھاتا ہے کہ کبھی ہمت نہیں ہارنی اور ہمیشہ کوشش کرتے رہنا ہے۔ میری کوشش ہوتی ہے کہ اپنی کمی اور غلطیوں پر قابو پاؤں اور خود کو ہر بار پہلے سے بہتر کروں۔ ورلڈکپ 2023 میں اچھی پرفارمنس نہیں تھی تو اپنی بولنگ پر کام کیا اور ہر جگہ پرفارمنس دی۔

ٹی ٹوئنٹی کرکٹ میں حکمت عملی

ٹی ٹوئنٹی کرکٹ پر بات کرتے ہوئے اسامہ میر نے کہا کہ اس فارمیٹ میں بولر کے پاس غلطی کی گنجائش کم ہوتی ہے۔ اپنی حکمت عملی کے حوالے سے بات کرتے ہوئے انہوں نے کہا کہ ہر میچ سے قبل بیٹر کی کمزوری اور سٹرینتھ دیکھتا ہوں اور اس کی کمزوری سے فائدہ اٹھانے کی کوشش کرتا ہوں۔ کوشش ہوتی ہے کہ ورائٹیز دکھانے کی بجائے ٹھیک جگہ پر بولنگ کرکے بیٹرز کو پریشان کروں۔ ایک سوال پر قومی آل راؤنڈر نے کہا کہ لیگ سپنر ٹی ٹوئنٹی میں وکٹ ٹیکنگ بولر ہوتا ہے لیکن شرط یہ ہے کہ ٹھیک جگہ پر بولنگ کی جائے۔