فی تولہ سونا مزید کتنا مہنگا ہونے کا امکان ہے؟

سونے کی قیمت میں اضافہ

کراچی (ڈیلی پاکستان آن لائن) موجودہ عالمی صورتحال کے پیش نظر سونے کی قیمت 4 لاکھ روپے تک جانے کا امکان ہے۔

یہ بھی پڑھیں: جنوبی افریقہ دوسرے ٹیسٹ میچ میں سری لنکا کو شکست دے کر ٹیسٹ چیمپئن شپ میں نمبر ون بن گیا

امریکہ اور چین کے درمیان کشیدگی

امریکہ اور چین کے درمیان تجارتی کشیدگی نے عالمی منڈیوں میں ہلچل مچا دی ہے اور اس کے اثرات پاکستان میں بھی شدت سے محسوس کیے جا رہے ہیں۔ پیر کو سونے کی قیمت میں صرف ایک دن میں 8100 روپے کا اضافہ ہوا، جس کے بعد یہ تاریخی سطح 357,800 روپے فی تولہ تک پہنچ گئی، جو کہ ملکی تاریخ کی بلند ترین سطح ہے۔ تاہم بدھ کو سونا یکدم ہی 11700 روپے کی بڑی کمی کے بعد تین لاکھ 46 ہزار 100 روپے پر آگیا۔ جنوری 2025ء کے آغاز میں سونا 2 لاکھ 73 ہزار 600 روپے فی تولہ دستیاب تھا، تاہم صرف تین ماہ میں قیمت 85 ہزار روپے سے زیادہ بڑھ چکی ہے۔

یہ بھی پڑھیں: بھارتی ایئر لائن کے جہاز کا پورا عملہ ہی دوران پرواز سو گیا پھر کیا ہوا؟ حیران کن انکشاف

سرمایہ کاری کے نئے رجحانات

لندن بلین مارکیٹ کے مطابق اِس وقت سونے میں سرمایہ کاری کا رجحان کئی دہائیوں کے بعد دوبارہ تیزی سے اوپر جارہا ہے۔ پاکستانی ماہرین اور جیولرز بھی یہی بتا رہے ہیں کہ سونا مہنگا ہونے کی بنیادی وجہ مقامی مارکیٹ کا دباؤ نہیں بلکہ عالمی منڈی کی صورتحال ہے۔ آل پاکستان صرافہ جیولرز ایسوسی ایشن کے صدر قاسم شکارپوری کا کہنا ہے کہ امریکہ اور چین کی اقتصادی چپقلش، نئی تجارتی پابندیوں اور غیر متوقع پالیسیوں نے سرمایہ کاروں کو متذبذب کر دیا ہے جو سونے کی طلب میں اضافہ کر رہی ہے۔ کراچی جیولرز ایسوسی ایشن کے نائب صدر عبداللہ چاند نے کہا ہے کہ امریکی صدر ڈونلڈ ٹرمپ کی سخت گیر پالیسیوں اور غیر متوقع بیانات نے عالمی سطح پر اعتماد کو دھچکا پہنچایا اور اس کا براہِ راست اثر سونے کی قیمت پر پڑا۔