کوئٹہ: کرایہ نہ ملنے پر سکول کو تالا، طالبات اور اساتذہ کو نکال دیا گیا

کوئٹہ (ڈیلی پاکستان آن لائن) کوئٹہ میں بروری روڈ پر واقع گورنمنٹ گرلز مڈل سکول کلی ابراہیم زئی کو اس وقت شدید مشکلات کا سامنا کرنا پڑا جب عمارت کے مالک نے محکمہ تعلیم کی جانب سے طویل عرصے سے کرایہ ادا نہ کئے جانے پر سکول کو تالا لگا دیا اور طالبات و اساتذہ کو باہر نکال دیا۔

عمارت کے مالک کی شکایت

نجی ٹی وی آج نیوز کے مطابق، عمارت کے مالک کا کہنا ہے کہ وہ کئی مرتبہ محکمہ تعلیم کے متعلقہ حکام کو کرایے کی عدم ادائیگی کے بارے میں آگاہ کر چکے ہیں لیکن کسی نے شنوائی نہیں کی۔ ان کا یہ بھی کہنا تھا کہ معاہدے کے تحت محکمہ تعلیم کی جانب سے ان کے کسی اہل خانہ کو ملازمت دینے کی یقین دہانی کرائی گئی تھی مگر وہ وعدہ بھی وفا نہ ہوا۔

صوبائی وزیر صحت کی مداخلت

واقعے کے بعد صوبائی وزیر صحت بخت محمد کاکڑ نے فوری طور پر عمارت کے مالک سے رابطہ کیا اور سکول کا کرایہ اپنی ذاتی جیب سے ادا کرنے کی یقین دہانی کرائی۔ وزیر صحت کا کہنا تھا کہ تعلیم اور صحت حکومت کی اولین ترجیحات میں شامل ہیں اور اس حوالے سے تمام مسائل کو جلد از جلد حل کیا جائے گا۔

تعلیمی سرگرمیوں کی بحالی

بخت محمد کاکڑ نے سکول کے تالے کھلوا کر تعلیمی سرگرمیوں کا دوبارہ آغاز کروایا ہے، جس سے طالبات اور ان کے والدین نے سکھ کا سانس لیا ہے۔