اپنی زمین، اپنا گھر: ای پورٹل کا افتتاح، لیکن اس سے کتنے مرلے کے پلاٹ مفت دیئے جانے ہیں؟ جانیے

پنجاب میں بے گھر افراد کے لئے نئے منصوبے کا آغاز

لاہور (ویب ڈیسک) وزیراعلیٰ پنجاب مریم نوازشریف نے پنجاب میں بے گھر افراد کو 3 مرلہ کے پلاٹ مفت دینے کے لئے "اپنی زمین، اپنا گھر" منصوبے کے ای پورٹل کا افتتاح کر دیا۔

یہ بھی پڑھیں: سیلاب زدہ علاقوں میں امدادی سرگرمیوں میں مصروف اسسٹنٹ کمشنر پتوکی دماغ کی شریان پھٹنے سے جاں بحق

ای پورٹل کا افتتاح

وزیراعلیٰ نے بٹن دبا کر منصوبے کے ای پورٹل azag.punjab.gov.pk کا افتتاح کیا، جس کے ذریعے شہری مفت پلاٹ کے لئے آن لائن درخواست دے سکیں گے۔ یہ منصوبہ "اپنی چھت، اپنا گھر" کی توسیع ہے، جس کے تحت اب تک 34 ہزار گھروں کی تعمیر کا عمل شروع ہو چکا ہے جبکہ 2 ہزار گھر مکمل ہو چکے ہیں۔

یہ بھی پڑھیں: بابراعظم کیلئے بڑی شخصیات نے آوازیں بلند کر دیں

پہلے مرحلے کی تفصیلات

"اپنی زمین، اپنا گھر" منصوبے کے پہلے مرحلے میں پنجاب کے 19 اضلاع میں 23 ہاؤسنگ سکیموں کے تحت 3 مرلے کے 2 ہزار پلاٹس مفت فراہم کیے جائیں گے۔ پہلے مرحلے میں پلاٹوں کی تقسیم جہلم، پتوکی، ماموں کانجن، لودھراں اور رینالہ خورد میں ہوگی اور قرعہ اندازی کے ذریعے منتخب افراد کو گھر کی تعمیر کے لئے آسان شرائط پر قرضے بھی دیئے جائیں گے۔

یہ بھی پڑھیں: میری سیٹ پر خیانت کرنے والا اے ڈی سی سیالکوٹ، ریحانہ ڈار، اللہ کی پکڑ میں آگیا

وزیراعلیٰ کا بیان

ای پورٹل کا افتتاح کرنے کے موقع پر وزیراعلیٰ پنجاب نے کہا کہ یہ منصوبے محض تعمیرات نہیں بلکہ ہزاروں خاندانوں کی دعائیں ہیں۔ قرض کی واپسی کے لئے آسان اقساط اور 3 ماہ کا گریس پیریڈ رکھا گیا ہے جبکہ قرضوں کی واپسی کا عمل بھی شروع ہو چکا ہے۔ انہوں نے یہ بھی کہا کہ یہ پروگرام میرے دل کے قریب ہے اور میرے قائد نواز شریف کا خواب ہے کہ ہر بے گھر کو اپنی چھت نصیب ہو، نواز شریف لوگوں کے گھر بنتے دیکھ کر خوش ہوتے ہیں۔

ماضی کا موازنہ

مریم نواز شریف نے اس بات پر بھی زور دیا کہ ماضی کی حکومتیں دہائیوں میں بھی اتنے گھر نہیں بنا سکیں جتنے گھروں کی بنیاد موجودہ حکومت نے صرف 6 ماہ میں رکھ دی ہے۔ قبل ازیں صوبائی وزیر ہاؤسنگ بلال یاسین نے بتایا کہ "اپنی چھت، اپنا گھر" کے تحت 33,500 افراد کو گھروں کی تعمیر کے لئے 36 ارب روپے کے قرض جاری کیے جا چکے ہیں۔