پاکستان میں 24 ہزار بچے ٹائپ ون ذیابیطس کا شکار، مفت علاج کے لئے 27 کلینک قائم

پاکستان میں ٹائپ ون ذیابیطس کی بڑھتی ہوئی شرح

کراچی(ڈیلی پاکستان آن لائن) انٹرنیشنل ڈائبیٹیز فیڈریشن کی نائب صدر ارم غفور نے انکشاف کیا ہے کہ پاکستان میں 25 سال سے کم عمر کے 24 ہزار بچے اور نوجوان ٹائپ ون ذیابیطس کا شکار ہیں۔ اس بیماری کے باعث ان کی زندگیوں کو انسولین کی کمی کی صورت میں خطرہ لاحق ہو سکتا ہے۔

یہ بھی پڑھیں: مراکز صحت کی ری ویمپنگ کیلیے 31دسمبر کی ڈیڈ لائن مقرر، بوسیدہ عمارتیں چمچماتے کلینکس میں تبدیل ہونگی:مریم نواز

خصوصی کلینکس کا قیام

ان بچوں کے مفت علاج کے لیے ملک بھر میں 27 خصوصی کلینک قائم کیے جا چکے ہیں۔ روزنامہ امت کے مطابق، کراچی پریس کلب کی ہیلتھ کمیٹی کی دعوت پر اپنے اعزاز میں دیے گئے ظہرانے کے بعد میڈیا سے گفتگو کرتے ہوئے ارم غفور نے بتایا کہ یہ کلینکس “چینجنگ ڈائبیٹیز ان چلڈرن” پروگرام کا حصہ ہیں، جو دنیا کے 32 ممالک میں جاری ہے۔ پاکستان میں اب تک 3,300 بچے اس پروگرام کے تحت رجسٹرڈ ہو چکے ہیں، جنہیں مفت انسولین، گلوکومیٹرز، پین ڈیوائسز، نیڈلز اور ٹیسٹنگ سٹرپس فراہم کی جا رہی ہیں۔

یہ بھی پڑھیں: پاکپتن میں ڈکیتی کے دوران لڑکی کے ساتھ مبینہ اجتماعی زیادتی کا سنسنی خیز موڑ

ارم غفور کا ذاتی تجربہ

انہوں نے بتایا کہ انہیں خود 14 سال کی عمر میں ٹائپ ون ذیابیطس کی تشخیص ہوئی تھی، مگر انہوں نے اس بیماری کو کمزوری نہیں بلکہ طاقت بنایا۔ "بچوں کے درد کو میں سمجھ سکتی ہوں، اسی لئے مجھے یہ پروجیکٹ سونپا گیا۔" ارم غفور نے مزید کہا کہ 2025 تک 40 کلینکس قائم کرنے کا ہدف مقرر تھا، جس میں سے 27 مکمل ہو چکے ہیں، جن میں 7 سندھ اور 9 پنجاب میں واقع ہیں۔ اب اس پروجیکٹ کی مدت 2030 تک بڑھا دی گئی ہے اور 6 ہزار بچوں تک رسائی کا ہدف رکھا گیا ہے۔

یہ بھی پڑھیں: گیانامیں فٹ بال میچ کے دوران ریفری کا متنازع فیصلہ، سٹیڈیم میدان جنگ بن گیا، 100 افراد ہلاک، عینی شاہدین کا موقف بھی آگیا

والدین کے لیے ہدایات

انہوں نے والدین کو مشورہ دیا کہ اگر ان کے بچے میں بار بار پیٹ درد، پیشاب، پیاس، قے، منہ کی بدبو یا سستی جیسی علامات ظاہر ہوں تو فوری ڈاکٹر سے رجوع کریں۔ ٹائپ ون ذیابیطس ایک آٹوامیون بیماری ہے، اور اس کی علامات کو نظر انداز نہیں کرنا چاہئے۔ اس موقع پر کراچی پریس کلب کے صدر فاضل جمیلی، جوائنٹ سیکرٹری محمد منصف، سیکرٹری ہیلتھ کمیٹی حامد الرحمٰن اور دیگر سینئر صحافی بھی موجود تھے۔ کلب کی جانب سے ارم غفور کو اجرک اور شیلڈ بھی پیش کی گئی۔

بین الاقوامی کامیابی

ارم غفور کو انٹرنیشنل ڈائبیٹیز فیڈریشن کی نائب صدر منتخب ہونے والی پہلی پاکستانی اور پہلی خاتون ہونے کا اعزاز حاصل ہوا ہے۔ اس الیکشن میں دنیا بھر کی 270 سے زائد ایسوسی ایشنز نے حصہ لیا تھا، جس میں انہوں نے 112 ووٹ لے کر کامیابی حاصل کی۔