محکمہ موسمیات نے موسم کے بارے میں نئی پیشگوئی کر دی

گرمی کی لہر کی پیش گوئی

اسلام آباد (آئی این پی) محکمہ موسمیات نے گرمی کی لہر کی پیش گوئی کرتے ہوئے کہا ہے کہ آج (جمعرات) سے ہوا کا زیادہ دباؤ ملک کے بیشتر علاقوں میں اثر انداز ہوگا۔ 15 سے 20 مئی تک سندھ، جنوبی پنجاب اور بلوچستان میں درجہ حرارت بڑھے گا۔ اس کے علاوہ جنوبی علاقوں میں درجہ حرارت 4 سے 6 ڈگری زیادہ رہنے کا امکان ہے۔ وسطی اور بالائی پنجاب، خیبرپختونخوا اور اسلام آباد میں درجہ حرارت زیادہ رہے گا، بالائی علاقوں میں درجہ حرارت 5 سے 7 ڈگری زائد رہنے کا امکان ہے۔

یہ بھی پڑھیں: ایران کی جوہری تنصیبات پر اسرائیل کو حملہ کرنے سے کس نے روکا؟ بڑا دعویٰ سامنے آ گیا

بارش اور تیز ہواؤں کی توقع

محکمہ موسمیات کے مطابق 19 مئی کی شام مغربی ہوائیں ملک کے بالائی علاقوں میں داخل ہوسکتی ہیں۔ 19 اور 20 مئی کو بالائی علاقوں میں تیز ہواؤں کے ساتھ بارش اور ژالہ باری کا امکان ہے۔ سندھ اور بلوچستان کے بیشتر اضلاع میں موسم گرم اور خشک جبکہ جنوبی اضلاع میں شدید گرم رہنے کی توقع ہے۔ پنجاب کے بیشتر اضلاع میں موسم گرم اور خشک رہنے کا امکان ہے جبکہ دن کے اوقات میں جنوبی اضلاع میں شدید گرم رہنے کی توقع ہے۔ خیبرپختونخوا کے بیشتر اضلاع میں موسم گرم اور خشک رہنے کی توقع ہے تاہم کوہستان اور مانسہرہ میں چند مقامات پر تیز ہواؤں اور گرج چمک کے ساتھ بارش کا امکان ہے۔

پچھلے 24 گھنٹے کا موسم

گذشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا تاہم کشمیر، گلگت بلتستان اور بالائی خیبرپختونخوا میں چند مقامات پر تیز ہواؤں اور گرج چمک کے ساتھ بارش ہوئی۔ لاہور میں موسم کے تیور بدلنے لگے، محکمہ موسمیات کی جانب سے درجہ حرارت 40 ڈگری سینٹی گریڈ تک جانے کی پیش گوئی کی گئی ہے، جبکہ احساس 42 ڈگری سینٹی گریڈ تک ہوسکتا ہے۔ اس کے علاوہ پنجاب کے مختلف علاقوں کا درجہ حرارت 40 ڈگری سے تجاوز کر جائے گا۔ ماہرین کا کہنا ہے کہ شہری دھوپ سے بچیں، ٹھنڈے مشروبات کا استعمال کریں۔