پاکستان اور ترکیہ صرف اتحادی نہیں ایمان، ثقافت اور تاریخ میں جُڑے بھائی ہیں :وزیراعلیٰ مریم نواز کی ترکیہ کے سفیر عرفان نذیراوغلو سے ملاقات، اہم امور پر گفتگو

وزیراعلیٰ پنجاب کی ترکی کے سفیر سے ملاقات

لاہور (ڈیلی پاکستان آن لائن) وزیراعلیٰ پنجاب مریم نواز سے ترکیہ کے سفیر عرفان نذیراوغلو (Irfan Neziroglu) نے ملاقات کی۔ وزیراعلیٰ مریم نواز شریف نے ترکیہ کے سفیر نذیراوغلو کا پرخلوص و پر تپاک خیر مقدم کیا۔ بھارتی جارحیت پر ترکیہ کی پاکستان کی دوٹوک حمایت پر وزیراعلیٰ نے اظہار تشکر کیا۔ پاکستان اور ترکی کے درمیان دوطرفہ تعلقات، تجارتی تعاون، علاقائی امن اور ثقافتی روابط پر تبادلۂ خیال کیا گیا۔

یہ بھی پڑھیں: وقار یونس، شعیب ملک، ثقلین مشتاق، مصباح الحق، سرفراز احمد مینٹورزشپ کے عہدوں سے فارغ

ترکی کی حمایت پر شکرگزاری

وزیراعلیٰ مریم نواز نے کہا کہ پاکستان ترکیہ کی بھارتی جارحیت پر سفارتی، اخلاقی اور اسٹریٹجک سطح پر غیرمتزلزل یکجہتی پر سپاس گزار ہے۔ صدر رجب طیب اردوان کا کہنا ہے کہ "ہم اچھے اور برے وقت میں پاکستان کے ساتھ ہیں" دلوں میں نقش ہو چکا ہے۔ سب پاکستانی ترکیہ کے بہن بھائیوں کے لیے دلی محبت اور عقیدت رکھتے ہیں۔ ترکیہ کی بھارتی جارحیت پر حالیہ غیر مشروط حمایت پاکستانی قوم ہمیشہ یاد رکھے گی۔

یہ بھی پڑھیں: نور ملک اور عشنا سہیل شہریار ملک میموریل ٹینس چیمپئن شپ کے سیمی فائنل میں پہنچ گئیں

پنجاب اور ترکیہ کے تعلقات

وزیراعلیٰ مریم نواز نے مزید کہا کہ پاکستان اور ترکیہ صرف اتحادی نہیں بلکہ ایمان، ثقافت اور تاریخ میں جُڑے ہوئے بھائی ہیں۔ پاکستان اور ترکیہ کے تعلقات باہمی اعتماد، غیر متزلزل حمایت اور مشترکہ اقدار کی درخشاں علامت ہیں۔ اناطولیہ ڈپلومیسی فورم کے وزٹ کے دوران حکومت ترکیہ اور خاتون اول کی مہمان نوازی پر بے حد مشکور ہوں۔ پاکستان اور ترکی کے درمیان دوطرفہ تجارت میں تعاون مزید بڑھانے کی ضرورت ہے۔ تجارت کو مزید تقویت دینے کے لیے ترکیہ کے ساتھ اشتراک کار بڑھائیں گے۔

ہائی لیول اسٹریٹجک کوآپریشن کونسل

وزیراعلیٰ مریم نواز نے کہا کہ 7ویں ہائی لیول اسٹریٹجک کوآپریشن کونسل کے دوران 24 معاہدوں پر دستخط خوش آئند ہیں۔ پنجاب ترکیہ کے ساتھ دوستی کو معاشی تحریک میں بدلنے کے لیے مکمل طور پر تیار ہے۔ پنجاب کے پاس برآمدات کی بے مثال صلاحیت، سرمایہ کار دوست، انفرااسٹرکچر اور دیگر بہترین مواقع موجود ہیں۔ ترکی اور پاکستان کی مذہبی و ثقافتی ہم آہنگی نمایاں ہے۔ ہم پاک، ترکیہ تعلقات کو نئی بلندیوں تک لے جانا چاہتے ہیں۔ پاک ترکیہ باہمی رشتہ وقت کی آزمائشوں میں کندن ہو کر مزید مضبوطی اور کامیابیوں کی نوید دے رہا ہے۔