اے ایس آئی کو روسی سفارتکار کو خفیہ معلومات دینے کے الزام میں سنائی گئی سزا کالعدم

اسلام آباد (ڈیلی پاکستان آن لائن) اسلام آباد ہائیکورٹ نے اے ایس آئی کو روسی سفارتکار کو خفیہ معلومات فراہم کرنے کے الزام میں سنائی گئی سزا کالعدم کردی۔ عدالت نے اے ایس آئی ظہور کو باعزت بری کر دیا۔

نجی ٹی وی چینل جیو نیوز کے مطابق جسٹس محسن اختر کیانی نے اے ایس آئی ظہور کی سزا کے خلاف اپیل منظور کر لی۔ اسلام آباد ہائیکورٹ نے کہا کہ اپیل کنندہ کی جانب سے کوئی خفیہ ڈاکیومنٹ شیئر نہیں کیا گیا، اور عدالت نے سماعت مکمل کرکے مختصر حکم دے دیا، تفصیلی فیصلہ بعد میں دیا جائے گا۔

یاد رہے کہ اے ایس آئی ظہور کے خلاف 13 دسمبر 2021 کو مقدمہ درج کیا گیا تھا۔ آفیشل سیکرٹ ایکٹ کی خصوصی عدالت نے ملزم کو 18 مئی 2024 کو 3 سال قید کی سزا سنائی تھی۔