سیکیورٹی فورسز کی لورا لائی اور کیچ میں کارروائیاں، 5 دہشتگرد ہلاک

بھارتی پراکسی تنظیم کے 5 دہشت گرد ہلاک

راولپنڈی (ڈیلی پاکستان آن لائن) سیکیورٹی فورسز نے بھارتی پراکسی تنظیم ’’فتنہ الہندوستان‘‘ کے 5 دہشت گردوں کو ہلاک کردیا۔

یہ بھی پڑھیں: دشمن اب کسی بھی مس ایڈونچر سے قبل سو بار سوچے گا: محسن نقوی

کارروائی کی تفصیلات

مسلح افواج کے شعبہ تعلقات عامہ (آئی ایس پی آر) کے مطابق، سیکیورٹی فورسز نے 28 مئی کو بلوچستان میں 2 مختلف کارروائیاں کیں۔ ضلع لورا لائی میں فتنہ الہندوستان کے دہشت گردوں کی موجودگی کی خفیہ اطلاع پر آپریشن کیا گیا۔ اس دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا۔ شدید فائرنگ کے تبادلے کے بعد بھارتی سرپرستی میں کام کرنے والے 4 دہشت گرد مارے گئے، جن کے قبضے سے اسلحہ، گولہ بارود اور دھماکا خیز مواد برآمد ہوا۔ ہلاک دہشت گرد دہشت گردی کی متعدد کارروائیوں میں ملوث تھے۔

یہ بھی پڑھیں: ذرا سی غفلت ریلوے کے سارے حفاظتی نظام کو تہہ و بالا کر دیتی ہے، سیکڑوں معصوم زندگیاں داؤ پر لگ جاتی ہیں، جواب دہ کانٹے والا بھی ہوتا ہے۔

مزید کارروائیاں

آئی ایس پی آر کے مطابق، سیکیورٹی فورسز نے ضلع کیچ میں بھی ایک کارروائی کی جس میں ایک دہشت گرد مارا گیا۔ ہلاک دہشت گرد 26 اگست 2024 اور 18 فروری 2025 کو این 70 پر راراشام کے قریب حملوں میں شامل تھا، ان حملوں میں 30 معصوم شہری شہید ہوئے تھے۔ بھارتی سرپرستی میں سرگرم یہ دہشت گرد قانون نافذ کرنے والے اداروں کے انتہائی مطلوب تھے۔

سیکیورٹی فورسز کا عزم

آئی ایس پی آر کے مطابق، سیکیورٹی فورسز ان دہشت گردوں کا مسلسل تعاقب کر رہی تھیں۔ سیکیورٹی فورسز ملک سے بھارتی سرپرستی میں ہونے والی دہشت گردی کا خاتمہ کرنے کے لیے عزم رکھتے ہیں اور دہشت گردی میں ملوث عناصر اور ان کے سہولت کاروں کو انصاف کے کٹہرے میں لایا جائے گا۔