بھارتی چیف آف ڈیفنس اسٹاف سے مستعفی ہونے کا مطالبہ

اسلام آباد (ڈیلی پاکستان آن لائن) بھارتی فوج کے سابق افسر اور دفاعی تجزیہ کار پراوین ساہنی نے بھارتی چیف آف ڈیفنس اسٹاف سے مستعفی ہونے کا مطالبہ کردیا۔

جنرل انیل چوہان کے اعترافات

اپنے بیان میں پراوین ساہنی نے کہا کہ جنرل انیل چوہان کا یہ اعتراف کہ بھارتی فضائیہ کے طیارے دو دن تک گراؤنڈ رہے، ان کے مستعفی ہونے کے لیے کافی ہے۔ بھارتی فضائیہ کے طیارے مار گرائے جانے کی تصدیق کرنے کے بعد مودی سرکار کو نئے چیف آف ڈیفنس اسٹاف اور ائیر چیف کا تقرر کرنا چاہیے۔

وار فیئر کی سمجھ بوجھ

ان کا کہنا تھا کہ انیل چوہان وار فیئر کو سمجھنے کی اہلیت نہیں رکھتے۔ پاک فضائیہ نے جنگ کے آغاز میں ہی فضا میں برتری حاصل کر لی تھی، جس نے جنگ کا نتیجہ متعین کر دیا تھا۔

مودی حکومت کا اثر

پراوین ساہنی کا کہنا تھا کہ جب سے مودی اقتدار میں آئے ہیں، بھارتی فضائیہ تنزلی کی طرف گامزن ہے۔ بھارت کو ایسی سرکار کی ضرورت ہے جو جدید جنگوں کو سمجھتی ہو۔ ایسے اعترافات کے بعد بھی آپریشن سندور کی کامیابی کا دعویٰ کرنا عجیب ہے۔