ایران کا اسرائیل پر ایک اور حملہ، کتنے میزائل داغے ؟

ایران کا اسرائیل پر میزائل حملہ

تہران (ڈیلی پاکستان آن لائن) ایران نے اسرائیل پر ایک بار پھر میزائل حملہ کر دیا ہے، جس کے بعد پورے اسرائیل میں خطرے کے سائرن بجائے گئے۔ مقامی وقت کے مطابق شام 5 بجے کے قریب اسرائیل کے مختلف علاقوں میں فضائی حملے کے سائرن بجے، جس کے بعد شہریوں کو فوری طور پر پناہ گاہوں میں جانے کی ہدایت کی گئی۔

یہ بھی پڑھیں: ایران اسرائیل کشیدگی: عراق، قطر سمیت مختلف ممالک کا فلائٹ آپریشن متاثر

اسرائیلی فوج کی تصدیق

سی این این کے مطابق اسرائیلی فوج (آئی ڈی ایف) نے ایک مختصر بیان میں تصدیق کی کہ "ایران دوبارہ حملہ کر رہا ہے"۔ فوج کا کہنا تھا کہ گذشتہ ایک گھنٹے میں ایران نے اسرائیل کی جانب کئی میزائل فائر کیے، جن میں سے بیشتر کو فضا میں ہی تباہ کر دیا گیا۔ کچھ دیر بعد اسرائیلی ہوم فرنٹ کمانڈ نے شہریوں کو پناہ گاہوں سے نکلنے کی اجازت دے دی اور خطرہ ٹلنے کا اعلان کیا۔

حملے کی تفصیلات

ایرانی سرکاری خبر رساں ایجنسی ارنا نے بتایا کہ ایران کی جانب سے تازہ حملے میں آٹھ میزائل داغے گئے۔ الجزیرہ کے مطابق حالیہ دنوں میں ایران کی جانب سے ہر حملے میں کم تعداد میں میزائل فائر کیے جا رہے ہیں، جبکہ جنگ کے ابتدائی دنوں میں بیک وقت درجنوں میزائل برسائے جا رہے تھے۔ جنگ کی شدت میں وقتی کمی کے باوجود دونوں ممالک کے درمیان کشیدگی بدستور برقرار ہے。