خیبرپختونخوا میں مون سون بارشوں سے 11 افراد جاں بحق، درجنوں گھر متاثر

پی ڈی ایم اے نے خیبرپختونخوا میں مون سون بارشوں کے باعث ہونے والے جانی و مالی نقصانات کی ابتدائی رپورٹ جاری کردی۔

جانی نقصان

نجی ٹی وی جیو نیوز کے مطابق، سیلاب کے باعث 11 افراد جاں بحق اور 6 زخمی ہوئے۔ جاں بحق ہونے والوں میں 4 مرد، 3 خواتین اور 4 بچے شامل ہیں۔

مالی نقصان

بارشوں اور فلیش فلڈ سے سوات میں سب سے زیادہ نقصان ہوا۔ پی ڈی ایم اے کے مطابق صوبے کے متاثرہ علاقوں میں مجموعی طور پر 56 گھروں کو نقصان پہنچا، جن میں سے 50 گھروں کو جزوی نقصان ہوا جبکہ 6 گھر مکمل طور پر تباہ ہوگئے۔

دریائے سوات کی صورتحال

پی ڈی ایم اے کا کہنا ہے کہ گزشتہ 24 گھنٹوں کے دوران دریائے سوات میں خوازہ خیلہ کے مقام پر سیلابی صورتحال کا سامنا رہا۔

احتیاطی تدابیر

پی ڈی ایم اے نے سیلابی خطرات کے پیش نظر ضلعی انتظامیہ نوشہرہ اور چارسدہ کو بھی الرٹ جاری کردیا۔ ہدایت کی گئی ہے کہ ضلعی انتظامیہ ممکنہ ہنگامی صورتحال یا سیلاب سے قبل پیشگی حفاظتی اقدامات کو یقینی بنائیں۔