صدر زرداری کے استعفے کی افواہیں، پاکستان پیپلز پارٹی پارلیمنٹرینز کی مرکزی ترجمان کا بیان آ گیا

صدر زرداری کے استعفے کی افواہیں

اسلام آباد (ڈیلی پاکستان آن لائن) صدر آصف علی زرداری کے استعفے کی افواہوں پر پاکستان پیپلز پارٹی پارلیمنٹرینز کی مرکزی ترجمان شایہ مری کا بیان آ گیا۔

یہ بھی پڑھیں: اب جو اللہ۔۔۔پہ چھوڑا ہے تو اچھا ہوگا

افواہوں کی حقیقت

پاکستان پیپلز پارٹی پارلیمنٹرینز کی مرکزی ترجمان شازیہ مری نے جاری کیے گئے بیان میں کہا ہے کہ صدر زرداری کے استعفے کی افواہیں من گھڑت اور جھوٹ پر مبنی ہیں۔ پیپلز پارٹی اور صدر آصف علی زرداری نے ثابت کیا ہے کہ ہم کبھی میدان نہیں چھوڑتے، تاریخ گواہ ہے کہ صدر آصف زرداری نے آمریت اور قید کا سامنا کیا لیکن پیچھے نہیں ہٹے۔ ہمارے اتحادیوں سے اچھے تعلقات ہیں اور 4 صوبائی اسمبلیوں، قومی اسمبلی اور سینیٹ میں دو تہائی اکثریت درکار ہے، اس لیے ایسے کسی سوال کا کوئی جواز نہیں۔

صدر زرداری کی سیاسی بصیرت

’’جنگ‘‘ کے مطابق شازیہ مری نے کہا کہ صدر زرداری وہ واحد سیاستدان ہیں جنہوں نے صدارتی اختیارات پارلیمان کو دیئے، صدر زرداری کی سیاسی بصیرت کی بدولت چاروں اکائیوں کو صوبائی خود مختاری ملی۔ جب ملک مشکلات میں آیا تو صدر زرداری ہی تھے جنہوں نے پاکستان کھپے کا نعرہ لگایا، حقوقِ بلوچستان ہوں یا سوات میں امن و امان کا قیام، یہ سب صدر زرداری کی بدولت ہی ممکن ہوا۔ صدر آصف علی زرداری ملک کے پہلے سویلین صدر ہوں گے جو اپنی 2 صدارتی مدتیں مکمل کریں گے۔