قرآن پاک ہاتھ میں تھامے خاتون کی بے بسی بتا رہی ہے کہ اس کو مارنے والے یہ سارے مرد کتنے غیرت مند ہیں، خواجہ آصف

وزیر دفاع کا بیان

اسلام آباد (ڈیلی پاکستان آن لائن) وزیر دفاع خواجہ آصف نے بلوچستان میں مبینہ طور پر غیرت کے نام پر قتل کے واقعے پر تبصرہ کرتے ہوئے کہا، "جن لوگوں نے ریاست کیخلاف بندوق اٹھائی ہوئی ہے، وہ پہلے اس نظام کے خلاف آواز اٹھائیں جو آپ کے آس پاس رائج ہے۔ سارا پاکستان آپکے ساتھ کھڑا ہوگا۔ اس ظلم کے نظام کے ذمہ دار آپکے بھائی بند ہیں۔" انہوں نے مزید کہا کہ "دوسرے صوبوں سے آئے مسافر اور روزی روٹی کمانے والے مزدور نہیں ہیں جن نہتوں کو آپ گولیاں مارتے ہیں۔"

یہ بھی پڑھیں: چیف جسٹس ایس سی او جوڈیشل کانفرنس کیلئے آج چین جائیں گے

منافقت اور شناخت

انہوں نے ایکس پر جاری کیے گئے اپنے بیان میں مزید کہا، "آپکی جدوجہد کی بنیاد منافقت ہے۔ آپکی شناخت وطن دشمنی ہے۔" انہوں نے مثال دیتے ہوئے کہا کہ "ان دونوں بچوں نے پسند کی شادی کی۔ ڈیڑھ سال چھپ کر رہتے رہے، پھر انہیں ڈھونڈ لیا گیا۔ جرگے نے واپسی کا جھانسہ دیا، وہ لوٹ آئے پھر جرگہ نے ان کی موت کا فیصلہ سنا دیا، پہلے لڑکے کو گولی ماری پھر لڑکی کو بھی گولیوں سے بھون دیا۔"

خواجہ آصف کی تشویش

خواجہ آصف کے مطابق "قران پاک ہاتھ میں تھامے خاتون کی بے بسی بتا رہی ہے کہ اس کو مارنے والے یہ سارے مرد کتنے غیرت مند ہیں۔"