ملک بھر میں بارشوں کا سلسلہ آج رات بھی جاری رہنے کا امکان ہے، محکمہ موسمیات کی پیش گوئی

موسمی صورتحال

اسلام آباد(ڈیلی پاکستان آن لائن) ملک کے بالائی علاقوں سمیت شمال مشرقی پنجاب میں بارشوں کا سلسلہ آج رات بھی جاری رہنے کی پیشگوئی کردی گئی۔ محکمہ موسمیات کے مطابق آج رات کشمیر، خیبر پختونخوا، اسلام آباد، پنجاب، گلگت بلتستان اور شمال مشرقی بلوچستان میں تیز ہواؤں اور گرج چمک کے ساتھ بارش کا امکان ہے۔

یہ بھی پڑھیں: یوم عاشورہ پر موسلادھار بارش متوقع، پی ڈی ایم اے کا الرٹ جاری

موسلا دھار بارش کی توقع

اس دوران بالائی خیبر پختونخوا، گلگت بلتستان، خطہ پوٹھوہار، شمال مشرقی پنجاب اور کشمیر میں موسلا دھار بارش متوقع ہے۔ محکمہ موسمیات نے برساتی ندی نالوں میں طغیانی کا خدشہ ظاہر کرتے ہوئے عوام الناس کو احتیاط برتنے کی ہدایت بھی کی ہے۔

احتیاطی تدابیر

محکمہ موسمیات کے مطابق ندی نالوں میں طغیانی کا خطرہ جبکہ پنجاب اور کے پی میں نشیبی علاقے زیر آب آنے کا خدشہ ہے۔