وزیراعلی خیبرپختونخوا تمام حدود پار کر رہے ہیں: وزیر داخلہ محسن نقوی

وزیر داخلہ کی پریس کانفرنس

اسلام آباد (ویب ڈیسک) وفاقی وزیرداخلہ محسن نقوی نے کہا ہے کہ وزیراعلی کے پی ساری حدود عبور کررہے ہیں۔ وزیر داخلہ نے کہا کہ پی ٹی آئی شنگھائی تعاون تنظیم اجلاس کو سبوتاژ کرنے کی سازش کررہی ہے لیکن ہم اسے ایسا کرنے نہیں دیں گے۔ اس سب کی ذمہ داری وزیراعلی کے پی پر عائد ہوتی ہے، انہیں سمجھانے کی بہت کوشش کی لیکن وہ سمجھنے کےلیے تیار نہیں، وہ ساری حدود پار کررہے ہیں۔

یہ بھی پڑھیں: پاک روس دو طرفہ تعلقات میں اہم پیشرفت، روسی وزیر خارجہ کا دورہ پاکستان متوقع

پولیس اہلکاروں سے ملاقات

ایکسپریس نیوز کے مطابق وفاقی وزیرداخلہ محسن نقوی نے اسلام آباد میں پولی کلینک ہسپتال کا دورہ کیا جہاں انہوں نے شرپسندوں کے ہاتھوں زخمی ہونے والے پولیس اہلکاروں سے ملاقات کی۔ انہوں نے زخمی پولیس اہلکاروں کے بلند حوصلے کو سراہتے ہوئے کہا کہ آپ نے شرپسندی کے باوجود تحمل کا مظاہرہ کیا، قانون کی عملداری کے لئے آپ نے فرض شناسی کی اعلی مثال قائم کی، آپ اسلام آباد پولیس کے بہادر سپوت ہیں اور ہمیں آپ پر ناز ہے۔

وزیراعلی خیبرپختونخوا کا رویہ

بعدازاں میڈیا سے گفتگو کرتے ہوئے محسن نقوی نے کہا کہ وزیر اعلی خیبرپختونخوا علی امین گنڈاپور ساری حدود عبور کررہے ہیں۔ ان کے قافلے سے پولیس پر فائرنگ کی گئی ہے جس کے نتیجے میں 80 سے 85 پولیس اہلکار زخمی ہوگئے۔