حوالہ ہنڈی اور انسانی سمگلنگ میں ملوث 2 ملزم گرفتار

ایف آئی اے کی کارروائیاں

پہلا معاملہ: حوالہ ہنڈی

لاہور (ڈیلی پاکستان آن لائن) ایف آئی اے کارپوریٹ کرائم سرکل نے اعظم کلاتھ مارکیٹ لاہور سے حوالہ ہنڈی میں ملوث ملزم کو گرفتار کر لیا۔ ترجمان کے مطابق گرفتار ملزم کی شناخت گل امیر کے نام سے ہوئی، جس کا تعلق پشاور سے ہے۔ ملزم کرنسی کی غیر قانونی ایکسچینج اور حوالہ ہنڈی میں ملوث پایا گیا۔

برآمد شدہ اشیاء

ترجمان ایف آئی اے کے مطابق چھاپہ مار کارروائی میں ملزم سے 64 لاکھ پاکستانی روپے برآمد ہوئے، حوالہ ہنڈی کی رسیدیں اور دیگر ڈیجیٹل شواہد بھی برآمد کر لیے گئے۔

دوسرا معاملہ: انسانی سمگلنگ اور ویزا فراڈ

ایف آئی اے لاہور زون کی ایک اور کارروائی میں انسانی سمگلنگ اور ویزا فراڈ میں ملوث ملزم کو دھر لیا گیا۔ ملزم کو ننکانہ صاحب سے گرفتار کیا گیا، جس کی شناخت محمد طلحہ لطیف کے نام سے ہوئی۔ یہ ملزم سادہ لوح شہریوں سے ویزا فراڈ کرنے میں ملوث ہے۔

فنڈز کا ہیر پھیر

ترجمان کے مطابق ملزم نے ساتھی کی ملی بھگت سے شہریوں کو دبئی اور بحرین میں ملازمت کا جھانسہ دے کر مجموعی طور پر 16 لاکھ 50 ہزار روپے بٹورے، اور بعد میں شہریوں کو بیرون ملک بھجوانے میں ناکام رہا۔ ملزم بھاری رقوم وصول کر کے روپوش ہو گیا تھا۔

گرفتاری اور برآمدات

ترجمان ایف آئی اے کے مطابق ملزم کے قبضے سے 16 پاکستانی پاسپورٹ بھی برآمد کر لئے گئے ہیں۔ جبکہ دیگر ساتھیوں کی گرفتاری کے لیے چھاپے مارے جا رہے ہیں۔