مون سون بارشوں کے ساتویں سپیل کا الرٹ جاری، کل سے 15 اگست تک کن شہروں میں شدید بارش کا امکان ہے؟ جانیے

پی ڈی ایم اے پنجاب کا مون سون بارشوں کا الرٹ

لاہور (ڈیلی پاکستان آن لائن) پی ڈی ایم اے پنجاب نے مون سون بارشوں کے ساتویں اسپیل کے بارے میں الرٹ جاری کر دیا ہے۔ 13 سے 15 اگست کے دوران پنجاب کے بیشتر اضلاع میں شدید مون سون بارشوں کی پیشگوئی کی گئی ہے۔ راولپنڈی، گوجرانوالہ، لاہور اور ڈیرہ غازی خان میں شدید بارشوں کا امکان ہے۔ دریائے سندھ، چناب، ستلج، جہلم اور راوی کے بالائی حصوں میں شدید موسلادھار بارشوں کی توقع ہے۔

یہ بھی پڑھیں: حسن ابدال میں گاڑی برساتی نالے میں گر گئی، 5 افراد کو زندہ نکال لیا گیا، 5 لاپتہ

کمشنرز و ڈپٹی کمشنرز کی ہدایات

ڈی جی پی ڈی ایم اے عرفان علی کاٹھیا نے صوبہ بھر کے کمشنرز اور ڈپٹی کمشنرز کو الرٹ رہنے کی ہدایات دی ہیں۔ ان کا کہنا تھا کہ لاہور، راولپنڈی، گوجرانوالہ اور سیالکوٹ میں اربن فلڈنگ کا خدشہ ہے۔ شدید بارشوں کے باعث بڑے دریاؤں سے ملحقہ ندی نالوں میں فلیش فلڈنگ کا بھی خطرہ ہے۔ پی ڈی ایم اے پنجاب نے سول ڈیفنس، ریسکیو اور دیگر متعلقہ اداروں کو پیشگی انتظامات مکمل کرنے کی ہدایات بھی جاری کی ہیں۔

یہ بھی پڑھیں: بوٹا سنگھ کی الم ناک کہانی: تقسیم میں کھوئی ہوئی محبت

ایمرجنسی کنٹرول رومز کی تیاری

ڈی جی پی ڈی ایم اے عرفان علی کاٹھیا نے مزید کہا کہ وزیر اعلیٰ پنجاب کی ہدایات کے پیش نظر متعلقہ محکموں کو الرٹ جاری کر دیا گیا ہے۔ ایمرجنسی کنٹرول رومز میں سٹاف کو الرٹ رکھا جائے۔ ریسکیو 1122 کی ڈیزاسٹر رسپانس ٹیموں کو بھی ہائی الرٹ پر رکھا جائے گا۔ شدید بارشوں کے باعث مری و گلیات میں لینڈ سلائیڈنگ کا خطرہ بھی محسوس کیا جا رہا ہے۔

احتیاطی تدابیر

بارشوں کے باعث کچے مکانات اور مخدوش عمارتوں کو نقصان کا خدشہ ہے۔ مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں۔ اربن و فلیش فلڈنگ کی صورت میں محفوظ مقامات پر رہیں اور گاڑی ہرگز بہتے ہوئے پانی سے کراس نہ کریں۔