بھارت نے آبی جارحیت کی، بڑے پیمانے پر تباہی ہوئی ہے: احسن اقبال

وفاقی وزیر کا بیان

نارووال (ڈیلی پاکستان آن لائن) وفاقی وزیر پلاننگ اینڈ ڈیولپمنٹ احسن اقبال نے کہا ہے کہ بھارت نے آبی جارحیت کی، بڑے پیمانے پر تباہی ہوئی ہے، بھارت نے پانی کو ہتھیار بنایا ہے۔

یہ بھی پڑھیں: حکومت کا مستقبل میں بجلی کی خریداری نہ کرنے کا فیصلہ، سستی بجلی کی فراہمی یقینی بنانے کا اعلان

سیلاب کی صورتحال

’’جنگ‘‘ کے مطابق سیلاب سے متاثرہ علاقوں کے دورے کے دوران میڈیا سے گفتگو کرتے ہوئے انہوں نے کہا کہ بھارت نے آبی جارحیت کی ہے، اگر بھارت سندھ طاس معاہدے کے مطابق پاکستان کے ساتھ ورکنگ انفارمیشن رکھتا تو کم نقصان ہوتا۔ لگتا ہے بھارت پانی جمع کر کے پاکستان کی طرف بھیج رہا ہے، تاکہ پاکستان کا زیادہ سے زیادہ نقصان ہو۔ وزیراعظم شہباز شریف کا کل نارووال کا دورہ متوقع ہے۔ وزیراعظم شہباز شریف سیلاب کی صورت حال کا جائزہ لیں گے، نارووال تاریخ کے بدترین سیلاب کا سامنا کر رہا ہے، پانی کا سکیل بہت زیادہ ہے۔ 6 سے 8 فٹ پانی باہر روڈ پر جمع ہو چکا ہے۔

زرعی نقصانات

احسن اقبال کا کہنا تھا کہ ہزاروں ایکڑ فصل تباہ ہو چکی ہے، اربوں روپے کا نقصان ہو چکا ہے۔ ہم سب کو مل کر سیاست سے بالا تر ہو کر کام کرنا ہوگا، یہ وہ آفت ہے جسے موسمیاتی تبدیلی کہتے ہیں، یہ وہ نئی آفت ہے جس کا مقابلہ کرنے کے لیے ہمیں صف بندی کرنی ہے۔