الخدمت فاؤنڈیشن کے تحت پنجاب کے سیلاب متاثرہ علاقوں میں ریسکیو و ریلیف آپریشن کا آغاز کردیا گیا

سیلاب متاثرین کی مدد

لاہور (ڈیلی پاکستان آن لائن) الخدمت فاؤنڈیشن کے تحت پنجاب کے مختلف اضلاع قصور، سیالکوٹ، نارووال اور لاہور میں سیلاب سے متاثرہ افراد کو ریسکیو کرنے اور ریلیف سرگرمیاں جاری ہیں۔

یہ بھی پڑھیں: پاکستان کے منہ توڑ جواب پر بھارت بوکھلا گیا

ہائی الرٹ ریسکیو اقدامات

سب سے زیادہ متاثرہ علاقے قصور اور سیالکوٹ کے تمام علاقوں میں الخدمت کی ٹیمیں ہائی الرٹ پر ہیں اور متاثرین کو محفوظ مقامات تک منتقل کر رہی ہیں۔ 4 کشتیوں اور 4 ایمبولینسوں کی مدد سے اب تک 234 متاثرین کو ریسکیو کر کے محفوظ مقامات تک پہنچایا جا چکا ہے۔ سیلاب متاثرہ علاقوں میں الخدمت کے موبائل ہیلتھ یونٹ (منی ہسپتال) کے علاوہ 4 میڈیکل کیمپس قائم کیے گئے ہیں جن کے ذریعے اب تک 1323 مریضوں کا علاج کیا جا چکا ہے۔ متاثرین میں 2123 افراد کو پکایا ہوا کھانا، 200 خاندانوں میں فوڈ پیکجز اور 760 افراد میں صاف پانی کی بوتلیں تقسیم کی جا چکی ہیں۔

یہ بھی پڑھیں: شیخوپورہ: داماد نے ہتھوڑے کے وار سے سسر کو قتل اور 3 خواتین کو زخمی کردیا

صدر الخدمت فاؤنڈیشن کا بیان

الخدمت فاؤنڈیشن پاکستان کے صدر ڈاکٹر حفیظ الرحمن کا کہنا ہے کہ پنجاب میں حالیہ بارشوں اور سیلاب کے باعث ہزاروں افراد متاثر ہوئے ہیں جنہیں فوری مدد کی ضرورت ہے۔ ہم اپنے بھائیوں اور بہنوں کو اس مشکل وقت میں تنہا نہیں چھوڑیں گے۔ متاثرہ علاقوں میں 460 رضاکار سرگرم ہیں جبکہ دو موبائل ہیلتھ یونٹس اور ایک ریسپانس وہیکل چکدرہ سے متاثرہ اضلاع کی طرف روانہ کر دی گئی ہیں۔

یہ بھی پڑھیں: کلبھوشن یادیو جیسا ایک اور بھارتی اہلکار گرفتار، یہ کہاں سے پکڑا گیا اور اس کا نام کیا ہے؟ بڑا انکشاف

دوسرے متاثرہ علاقوں میں امدادی سرگرمیاں

ڈاکٹر حفیظ الرحمن نے کہا کہ پنجاب کے ساتھ ساتھ خیبر پختونخوا اور گلگت کے سیلاب متاثرہ علاقوں میں بھی الخدمت کے رضاکار دن رات متاثرین کی مدد میں مصروف ہیں۔ رضاکار نہ صرف متاثرہ خاندانوں کو کھانا اور صاف پانی فراہم کر رہے ہیں بلکہ ان کے گھروں اور دکانوں سے ملبہ ہٹانے میں بھی عملی طور پر مدد کر رہے ہیں۔

موسمیاتی تبدیلی اور امداد کی اپیل

ڈاکٹر حفیظ الرحمن نے مزید کہا کہ موسمیاتی تبدیلیوں میں پاکستان کا حصہ نہ ہونے کے برابر ہے لیکن پاکستان ان تبدیلیوں سے سب سے زیادہ متاثرہ ممالک میں شامل ہے۔ انہوں نے مخیر حضرات اور اہل خیر سے اپیل کی کہ وہ مشکل کی اس گھڑی میں آگے بڑھ کر متاثرہ ہم وطنوں کی مدد کریں۔ الخدمت فاؤنڈیشن حسبِ روایت متاثرین کے ساتھ کھڑی ہے اور ان کی مکمل بحالی تک امدادی سرگرمیاں جاری رکھے گی.