وزیر خزانہ پنجاب مجتبیٰ شجاع الرحمان کا فیض پور کلاں شرقپور اور چوہنگ میں سیلاب متاثرین کیمپس کا دورہ

سیلاب متاثرین کی عید میلاد النبی تقریبات

لاہور (ڈیلی پاکستان آن لائن) وزیر خزانہ پنجاب مجتبیٰ شجاع الرحمان نے عید میلاد النبی صلی اللہ علیہ وآلہ وسلم کے موقع پر فیض پور کلاں شرقپور اور ملتان روڈ لاہور چوہنگ میں سیلاب متاثرین کیمپس کا دورہ کیا۔ یہاں انہوں نے کیمپس میں امدادی کارروائیوں، خوراک، پینے کے صاف پانی اور دیگر سہولیات کا جائزہ لیا اور کیمپس میں منعقدہ عید میلاد النبی کی تقریبات میں شرکت کی۔

یہ بھی پڑھیں: باجوڑ میں 2 خواتین سمیت 3 افراد قتل، ایچ آر سی پی نے تحقیقات کا مطالبہ کر دیا

متاثرین کو عید میلاد کی مبارکباد

صوبائی وزیر نے کیمپس میں مقیم سیلاب زدگان کو عید میلاد نبی کریم صلی اللہ علیہ وآلہ وسلم کی مبارکباد پیش کی اور متاثرین میں مٹھائی تقسیم کی۔ اس موقع پر تقریب کے شرکاء سے خطاب کرتے ہوئے انہوں نے کہا کہ آج ہم نبی کریم صلی اللہ علیہ وآلہ وسلم کا 1500واں یوم ولادت یہاں سیلاب زدگان کے ساتھ منا رہے ہیں۔ اس سال پنجاب حکومت کے تحت ربیع الاول کے پورے مہینے میں عید میلاد النبی ﷺ کی تقریبات منعقد کی جائیں گی، جہاں پاکستان کی سلامتی، استحکام، اور سیلاب زدگان کی بحالی کے لیے خصوصی دعائیں کروائی جائیں گی۔

یہ بھی پڑھیں: ملازم پر فائرنگ کا کیس، موسیٰ مانیکا ضمانت پر رہا

ریلیف اقدامات اور مستقبل کی منصوبہ بندی

صوبائی وزیر نے بتایا کہ حکومت پنجاب وزیر اعلیٰ مریم نواز کی قیادت میں سیلاب زدگان کی ریلیف اور بحالی کے لیے ہر ممکن اقدام کر رہی ہے۔ آئندہ سیلاب سے تحفظ کے لیے لانگ ٹرم اور فول پروف پلاننگ کی جا رہی ہے۔ حکومت حالیہ سیلاب زدگان سے بھی غافل نہیں رہے گی۔ سیلاب متاثرین کو باقاعدہ پیکج کے تحت ریلیف دیا جائے گا اور ان کی بحالی تک انہیں بجلی کے بلز اور ٹیکسز میں بھی خصوصی ریلیف فراہم کیا جائے گا۔

مدت منتخب اقلام اور سول سوسائٹی کا کردار

صوبائی وزیر نے میڈیا نمائندگان کو بتایا کہ سیلاب زدگان کی امداد کے لیے حکومت اور انتظامیہ سرگرم عمل ہیں جبکہ سول سوسائٹی کے نمائندگان اور مختلف آرگنائزیشنز بھی بڑھ چڑھ کر حصہ لے رہی ہیں۔ حکومتی ادارے متاثرہ علاقوں سے سیلاب زدگان کو حفاظتی کیمپس میں اکٹھا کر رہے ہیں تاکہ امدادی کارروائیوں کو یکجا کیا جا سکے۔ حکومت پنجاب کے تحت پورا مہینہ جاری رہنے والی تقریبات میں رسول اکرم صلی اللہ علیہ وآلہ وسلم کی تعلیمات عام کی جائیں گی، لوگ بھائی چارے اور مساوات کے پیغام کو عام کرنے کی کوشش کریں گے۔ عید میلاد النبی کے موقع پر سیلاب زدگان کی دلجوئی بھی رحمت اللعالمین ﷺ کی تعلیمات کا حصہ ہے۔ یہی وجہ ہے کہ وزیر اعلیٰ مریم نواز کی ہدایت پر آج پوری کابینہ سیلاب متاثرین کی ریلیف کے لیے سرگرم عمل ہے۔