صدر مملکت آصف علی زرداری کا جے 10 سی طیارے بنانے والے ایئر کرافٹ کمپلیکس کا دورہ

صدر زرداری کا جے 10 سی ایئر کرافٹ کمپلیکس کا دورہ

بیجنگ(ڈیلی پاکستان آن لائن) صدرِ مملکت آصف علی زرداری نے جے 10 سی طیارے بنانے والے ایئر کرافٹ کمپلیکس کا دورہ کیا۔ صدرِ مملکت نے مسلح افواج کے سپریم کمانڈر کی حیثیت میں چین کے ایوی ایشن انڈسٹری کارپوریشن کے ایئر کرافٹ کمپلیکس کا دورہ کیا۔

یہ بھی پڑھیں: بانی پی ٹی آئی کو پھر قید تنہائی میں رکھا گیا ہے، علیمہ خان کا بیان

جے 10 سی طیارے کی خصوصیات

اعلامیے کے مطابق حالیہ معرکۂ حق میں کلیدی کردار ادا کرنے والے طیارے جے 10 سی اسی ایئر کرافٹ کمپلیکس میں تیار کیے جاتے ہیں۔ صدر آصف علی زرداری نے کمپلیکس کا دورۂ بھارت سے جنگ بندی کے 128 ویں روز کیا ہے، وہاں انہوں نے سائنسدانوں اور انجینئرز سے ملاقات کی ہے۔ اعلامیے میں کہا گیا ہے دورے کے دوران صدر کو جے 10، جے ایف 17 اور جے 20 اسٹیلتھ فائٹرز، ڈرونز، خود کار یونٹس اور ملٹی ڈومین آپریشنز پر بریفنگ دی گئی۔

یہ بھی پڑھیں: سکھر میں مگرمچھ کا نہر کنارے کپڑے دھونے والی خاتون پر خوفناک حملہ

پاک فضائیہ کی مضبوطی میں کردار

صدرِ مملکت نے اس موقع پر کہا کہ جے 10 اور جے ایف 17 نے پاک فضائیہ کو مضبوط بنایا، مئی 2025ء کے معرکۂ حق اور آپریشن بنیان مرصوص میں ان طیاروں کی کارکردگی شاندار رہی۔ اعلامیے کے مطابق صدرِ مملکت نے اے وی آئی سی کو چین کی ٹیکنالوجی اور پاک چین اسٹریٹجک شراکت داری کی علامت قرار دیا۔

پاکستان اور چین کا دفاعی تعاون

اعلامیے میں کہا گیا ہے کہ پاکستان چین کے ساتھ دفاعی پیداوار اور ہوا بازی میں تعاون بڑھانے کا عزم رکھتا ہے۔ صدر زرداری پہلے غیر ملکی سربراہ ہیں، جنہوں نے اس کمپلیکس کا دورہ کیا۔ اعلامیے کے مطابق بلاول بھٹو زرداری، خاتونِ اوّل آصفہ بھٹو زرداری، سینیٹر سلیم مانڈوی والا، پاکستانی سفیر خلیل ہاشمی اور چینی سفیر جیانگ زائی ڈونگ بھی صدرِ مملکت کے ہمراہ تھے.