اپنی فضاء، پانی اور زمین کو آئندہ نسلوں کیلئے محفوظ بنانے میں ہاتھ بٹائیں، وزیراعلیٰ مریم نواز کی اپیل

وزیراعلیٰ پنجاب کا اوزون کے تحفظ کے عالمی دن پر پیغام

لاہور (ڈیلی پاکستان آن لائن) وزیراعلیٰ پنجاب مریم نواز نے اوزون کے تحفظ کے عالمی دن پر اپنے پیغام میں کہا ہے کہ اوزون ہماری ماحولیات کی محافظ ہے۔ اسے بچانا انسانیت کا اہم ترین فریضہ ہے۔ اوزون کی تباہی کا مطلب، امراض، فصلوں کی بربادی اور نسلِ نو کے مستقبل کے لیے خطرات ہیں۔ موسمیاتی تبدیلی نے بارشوں کے انداز بدل دیئے، پنجاب حالیہ تباہ کن سیلاب کی شکل میں خمیازہ بھگت رہا ہے۔

یہ بھی پڑھیں: وزیراعظم کا چاروں وزرائے اعلیٰ اور گورنروں سے رابطہ، عیدالاضحیٰ کی مبارکباد دی

ماحولیاتی پالیسی اور اقدامات

وزیراعلیٰ مریم نواز نے کہا کہ پہلی بار پنجاب کے لیے جامع ماحولیاتی پالیسی فراہم کی گئی تاکہ زمین بچوں کے لیے محفوظ رہ سکے۔ پنجاب میں ماحول دوست الیکٹرک بسیں متعارف کروائیں جائیں گی جو کلین انرجی سے چلتی ہیں اور آلودگی کم کرتی ہیں۔ "پلانٹ فار پاکستان" مہم کے ذریعے شجرکاری کرکے فضاء کو ازسرِنو سانس لینے کے قابل بنایا جا رہا ہے۔

امید اور ذمہ داری

وزیراعلیٰ مریم نواز نے کہا کہ پنجاب تیزی سے گرین انرجی، سولرائزیشن اور ماحول دوست منصوبوں کی طرف بڑھ رہا ہے۔ اوزون پروٹیکشن محض حکومت کی نہیں، بلکہ ہر شہری کی ذمہ داری ہے، اپنا کردار ادا کریں۔ وزیراعلیٰ مریم نواز نے عوام سے اپیل کی ہے کہ وہ اپنی فضاء، پانی اور زمین کو آئندہ نسلوں کے لیے محفوظ بنانے میں ہاتھ بٹائیں۔ پنجاب سرسبز، صاف اور محفوظ مستقبل کی طرف بڑھ رہا ہے، یہ سفر اب کسی صورت نہیں رکے گا۔