خیبر پختونخوا سے وفد کا دورۂ پنجاب، ویمن پروٹیکشن اتھارٹی کے ہیڈ آفس میں تفصیلی بریفنگ میں شرکت

خیبرپختونخوا وفد کا دورہ پنجاب ویمن پروٹیکشن اتھارٹی

لاہور(ڈیلی پاکستان آن لائن) خیبرپختونخوا کے صوبائی فورم کے اراکین اور سرکاری افسران پر مشتمل ایک معزز وفد نے ’’آواز II‘‘ پروگرام کے تحت پنجاب ویمن پروٹیکشن اتھارٹی (PWPA) کے ہیڈ آفس کا دورہ کیا۔ یہ پروگرام برٹش کونسل کے تعاون سے ’’پیس اینڈ جسٹس نیٹ ورک (PJN)‘‘ کے زیر انتظام خواتین، بچوں، نوجوانوں اور محروم طبقات کے حقوق کے فروغ، سماجی ہم آہنگی اور پرامن معاشرے کے قیام کے لیے جاری ہے۔

یہ بھی پڑھیں: ٹک ٹاکر ثناء یوسف قتل کیس: ملزم کا مزید 3 روزہ جسمانی ریمانڈ منظور

ڈائریکٹر جنرل کی بریفنگ

وفد کو ڈائریکٹر جنرل پنجاب ویمن پروٹیکشن اتھارٹی کلثوم ثاقب نے خوش آمدید کہا اور اتھارٹی کے نظام، قانونی فریم ورک اور خواتین کے تحفظ کے لیے وضع کردہ میکنزم پر تفصیلی بریفنگ دی۔ ڈی جی نے وفد کو بتایا کہ اتھارٹی کس طرح شیلٹر ہومز، ویمن پروٹیکشن سنٹرز، ہیلپ لائن اور قانون نافذ کرنے والے اداروں کے ساتھ مربوط کوآرڈینیشن کے ذریعے خواتین کو فوری اور مؤثر مدد فراہم کر رہی ہے۔

یہ بھی پڑھیں: ذرا سی غفلت ریلوے کے سارے حفاظتی نظام کو تہہ و بالا کر دیتی ہے، سیکڑوں معصوم زندگیاں داؤ پر لگ جاتی ہیں، جواب دہ کانٹے والا بھی ہوتا ہے۔

لاہور ویمن پروٹیکشن سنٹر کا دورہ

بعد ازاں وفد نے لاہور ویمن پروٹیکشن سنٹر کا بھی دورہ کیا، جہاں ڈسٹرکٹ ویمن پروٹیکشن آفیسر لاہور، محترمہ رابعہ عثمان نے خواتین کو فراہم کی جانے والی سہولیات پر بریفنگ دی۔ ان سہولیات میں قانونی معاونت، طبی سہارا، کونسلنگ اور فوری تحفظ شامل ہیں جو گھریلو تشدد یا کسی بھی قسم کے تشدد کا شکار خواتین کے لیے فراہم کی جاتی ہیں۔

بین الصوبائی وزٹ کا مقصد

اس بین الصوبائی وزٹ کا مقصد پنجاب اور خیبرپختونخوا کے مابین بہترین عملی تجربات کا تبادلہ تھا، تاکہ ’’آواز II‘‘ اور ’’پیس اینڈ جسٹس نیٹ ورک‘‘ کے اس وژن کو آگے بڑھایا جا سکے جس کے تحت ایک پرامن، برداشت پر مبنی اور تشدد سے پاک معاشرے کا قیام ممکن بنایا جا رہا ہے。