بونا بھی تو ہے یہ، جسپریت بمراہ نے جنوبی افریقہ کے کپتان ٹیمبا باووما کو تنقید کا نشانہ بنا ڈالا

بھارت اور جنوبی افریقہ کے درمیان ٹیسٹ میچ

نئی دہلی(ڈیلی پاکستان آن لائن)ایڈن گارڈنز میں بھارت اور جنوبی افریقہ کے درمیان پہلے ٹیسٹ کے پہلے دن بھارتی فاسٹ بولر جسپریت بمراہ کو ایک متنازع جملے نے مشکل میں ڈال دیا۔ یہ واقعہ اس وقت پیش آیا جب جنوبی افریقی کپتان ٹیمبا باووما بھارتی بولر جسپریت بمراہ کی گیند پر ایل بی ڈبلیو کی اپیل کا سامنا کر رہے تھے، گیند باووما کے پیڈ پر لگی اور بمراہ نے پرزور اپیل کی لیکن امپائر نے اسے ناٹ آؤٹ قرار دے دیا۔

متنازع گفتگو کا معاملہ

فیصلے کے بعد بمراہ اور ان کے ساتھی کھلاڑی ڈی آر ایس لینے یا نہ لینے پر بات کر رہے تھے کہ اسی دوران اسٹمپ مائیک پر بمراہ کی آواز ریکارڈ ہوئی جس میں وہ مبینہ طور پر باووما کے قد پر طنز کرتے ہوئے یہ کہتے سنائی دیے کہ 'بونا بھی ہے'، ساتھ ہی انہوں نے گالی بھی دی۔ اسی گفتگو میں وکٹ کیپر رشبھ پنت کی بھی یہی بات دہراتے ہوئے آواز ریکارڈ ہوئی، جس نے سوشل میڈیا پر بحث کو مزید ہوا دی۔ چند ہی منٹ میں یہ کلپ مختلف پلیٹ فارمز پر تیزی سے وائرل ہوگیا اور کرکٹ شائقین کی جانب سے شدید ردِعمل دیکھنے میں آیا。