پاکستان عالمی آئی ٹی حب کے طور پر ابھر رہا ہے: صوبائی وزیر سندھ علی راشد

استقبالیہ تقریب کا انعقاد

ریاض (وقار نسیم وامق) سعودی عرب کے دارالحکومت ریاض میں پاکستان انویسٹرز فورم کی جانب سے سندھ کے صوبائی وزیر برائے انفارمیشن ٹیکنالوجی علی راشد کے اعزاز میں استقبالیہ تقریب منعقد کی گئی جس میں سفارتی افسران، آئی ٹی کے شعبے سے تعلق رکھنے والے ماہرین اور کاروباری شخصیات نے شرکت کی۔

یہ بھی پڑھیں: معروف اطالوی اداکارہ کلاڈیا کارڈینیل 87 برس کی عمر میں چل بسیں

صوبائی وزیر کا خطاب

تقریب سے خطاب کرتے ہوئے صوبائی وزیر برائے انفارمیشن ٹیکنالوجی علی راشد نے کہا کہ پاکستان تیزی سے ایک بڑے آئی ٹی حب کے طور پر دنیا کے سامنے آ رہا ہے۔ سندھ حکومت اس شعبے میں عالمی معیار کے مطابق اقدامات کر رہی ہے۔ انہوں نے بتایا کہ اب تک پینتیس ہزار نوجوانوں کو گوگل کی تعلیم سے آراستہ کیا جا چکا ہے، جو پاکستان کے آئی ٹی مستقبل کی مضبوط بنیاد ہے۔ علی راشد نے زور دیا کہ نوجوان نسل کو جدید علوم اور ٹیکنالوجی سے فائدہ حاصل کرنا چاہئے اور حکومت اس ضمن میں ہر ممکن تعاون فراہم کر رہی ہے۔

یہ بھی پڑھیں: سربراہ پاک فضائیہ کا سکواڈرن لیڈر عثمان یوسف شہید کے خاندان سے اظہار تعزیت

سفارت خانہ پاکستان کا پیغام

سفارت خانہ پاکستان ریاض کے کمیونٹی ویلفیئر اتاشی صاعد عزیز نے اپنے خطاب میں کہا کہ سعودی ویژن 2030 کے تحت سعودی عرب میں آئی ٹی اور ڈیجیٹل ٹیکنالوجی سے متعلق متعدد منصوبے جاری ہیں، اور اس شعبے میں پاکستانی ماہرین اور کمپنیوں کے لیے وسیع مواقع موجود ہیں۔

یہ بھی پڑھیں: محمد رضوان نے اپنے کیپنگ گلوز اور شرٹ سڈنی کرکٹ گراؤنڈ میوزیم کو عطیہ کردی

انویسٹرز فورم کی جانب سے مثبت تشہیر

انویسٹرز فورم کے فہد علی صدیقی نے تقریب سے خطاب کرتے ہوئے کہا کہ آئی ٹی کے حوالے سے حکومت کی مثبت پالیسی اور ڈائریکشن واضح ہو چکی ہے، اور خوشی کی بات ہے کہ اس کے خاطر خواہ نتائج سامنے آ رہے ہیں۔

پاکستان اور سعودی عرب کے درمیان تعاون

تقریب سے انویسٹرز فورم کے صدر غلام صفدر، وائس چیئرمین خالد راجہ، سیکرٹری جنرل ظفر جاوید اور دیگر مقررین نے بھی خطاب کیا اور پاکستان و سعودی عرب کے درمیان آئی ٹی کے شعبے میں تعاون کو مزید فروغ دینے پر زور دیتے ہوئے کہا کہ دونوں ممالک کے درمیان آئی ٹی کے میدان میں شراکت داری نہ صرف کاروباری مواقع کو بڑھائے گی بلکہ نوجوان نسل کے لیے روزگار اور ترقی کی نئی راہیں بھی کھولے گی۔