بھارت کسی کو منہ دکھانے کے قابل نہیں، سندھ تاقیامت پاکستان کا حصہ رہے گا : شرجیل میمن

شرجیل انعام میمن کا بیان

کراچی (ڈیلی پاکستان آن لائن) سندھ کے سینئر وزیر شرجیل انعام میمن نے کہا ہے کہ بھارت کسی کو منہ دکھانے کے قابل نہیں ہے، بین الاقوامی سطح پر اکیلا ہوتا جا رہا ہے۔ سندھ تاقیامت پاکستان کا حصہ رہے گا بھارتی وزیر دفاع کا خواب کبھی پورا نہیں ہوگا۔

یہ بھی پڑھیں: سہیل آفریدی کی الیکشن کمیشن کے نوٹس کے خلاف درخواست پر فیصلہ محفوظ

بھارتی وزیر دفاع کے بیان پر ردعمل

کراچی میں پریس کانفرنس کے دوران بھارتی وزیر دفاع کے بیان پر ردعمل دیتے ہوئے سندھ کے سینئر وزیر شرجیل انعام میمن نے کہا کہ حالیہ پاک، بھارت کشیدگی سے قبل بھارت نے ایک حرکت کی تھی، ان کے ابھی نندن کا جہاز گرایا اور چائے پلائی۔ پہلگام واقعے کے بعد بھارت نے پھر حرکت کی لیکن اسے شرمندگی کا سامنا ہوا۔ بھارت رقبے، آبادی و وسائل کے لحاظ سے کافی بڑا ملک ہے جبکہ پاکستان وسائل کم ہونے کے باوجود کافی عرصے سے دہشتگردی سے لڑ رہا ہے، ہم نے بہت قربانیاں دی ہیں۔

افواج کی قابلیت پر زور

’’جنگ‘‘ کے مطابق شرجیل میمن کا کہنا تھا کہ حالیہ کشیدگی کے دوران ہماری افواج نے بھارت کو منہ توڑ جواب دیا، اسے عبرت ناک شکست دی، جس کے بعد بھارت کسی کو منہ دکھانے کے قابل نہیں ہے، بین الاقوامی سطح پر بھارت اکیلا ہوتا جا رہا ہے۔ اس لیے اس طرح کے شوشے چھوڑتے رہیں گے لیکن سندھ تاقیامت پاکستان کا حصہ رہے گا۔ بھارتی وزیر دفاع کی خواہش کبھی پوری نہیں ہوگی۔ بھارت کا خواب خواب ہی رہے گا۔