آئی ایس آئی کی بڑی کارروائی، داعش خراسان کا اہم رہنما سلطان عزیز اعظم گرفتار

سلطان عزیز اعظّم کی گرفتاری

اسلام آباد (ڈیلی پاکستان آن لائن) انٹر سروسز انٹیلی جنس (آئی ایس آئی) نے داعش خراسان (ISKP) کے اہم ترین رہنماؤں میں سے ایک، سلطان عزیز اعظّم کو گرفتار کر لیا ہے۔ سلطان عزیز اعظّم کو تنظیم کا نائب سربراہ سمجھا جاتا تھا اور وہ داعش خراسان کے مرکزی پروپیگنڈا نیٹ ورک العزائم میڈیا (Al-Azaim Media) کا بانی بھی تھا۔

یہ بھی پڑھیں: پاکستان میں بھارتی ویب سائٹس بلاک کردی گئی ہیں: فیصل واوڈا

سلطان عزیز اعظّم کی معلومات

سیکیورٹی ذرائع کے مطابق 1978 میں افغان صوبے ننگرہار میں پیدا ہونے والا سلطان عزیز اعظّم ننگرہار یونیورسٹی کا گریجویٹ ہے۔ وہ 2016 میں داعش خراسان میں شامل ہوا اور جلد ہی تنظیم کے میڈیا و بھرتی کے نیٹ ورک کا سربراہ بن گیا، جو دہشت گرد تنظیم کی نظریاتی تشہیر، آن لائن پروپیگنڈا اور نئے جنگجوؤں کی بھرتی میں کلیدی کردار ادا کرتا تھا۔

یہ بھی پڑھیں: سیلاب کی مشکل گھڑی، مسلح افواج یوم دفاع وشہدا انتہائی سادگی سے منا رہی ہیں: آئی ایس پی آر

نومبر 2021 میں امریکی حکومت کی کارروائی

امریکی حکومت نے نومبر 2021 میں سلطان عزیز اعظّم کو اسپیشل ڈیزگنیٹڈ گلوبل ٹیررسٹ (SDGT) قرار دیا تھا، جس کی وجہ داعش خراسان کے انتہا پسندانہ نظریات کے فروغ اور عالمی سطح پر اس کی سرگرمیوں میں اس کا مرکزی کردار تھا۔

گرفتاری کا اثر

سکیورٹی ذرائع کے مطابق سلطان عزیز اعظّم کی گرفتاری داعش خراسان کی قیادت اور اس کے میڈیا و پروپیگنڈا ڈھانچے کے لیے ایک بڑا دھچکا ہے۔ یہ کارروائی پاکستان کی جانب سے سرحد پار دہشت گردی اور بین الاقوامی شدت پسند نیٹ ورکس کے خلاف جاری مؤثر اقدامات کا واضح ثبوت ہے۔