غریب آدمی کہیں بھی ہو گا، مریم نواز اُس کے ساتھ کھڑی ہے، عظمیٰ بخاری

وزیرِ اطلاعات پنجاب کا بیان

لاہور(ڈیلی پاکستان آن لائن) وزیرِ اطلاعات پنجاب عظمیٰ بخاری نے کہا ہے کہ غریب آدمی کہیں بھی ہو گا، مریم نواز اُس کے ساتھ کھڑی ہے۔ صوبائی اسمبلی میں گفتگو کے دوران عظمیٰ بخاری نے کہا کہ بیوروکریسی کے ساتھ ہی ملک چلتا ہے، پوچھتی ہوں بوگس دستاویزات کے خلاف کارروائی کیسے غلط ہے؟

یہ بھی پڑھیں: ایکسپریس اور فریٹ ٹرینوں کے کرایوں میں اضافے کا اعلان

حکومتی اقدامات اور عوام کو ریلیف

انہوں نے کہا کہ یہ دیکھیے حکومتی اقدام کے باعث لوگوں کو کتنا ریلیف ملا، قبضہ مافیا سے چھین کر حق دار کو حق دلانا غلط ہے کیا۔ وزیرِ اطلاعات پنجاب نے مزید کہا کہ حکومت قبضہ مافیا سے تنگ آئے لوگوں کے ساتھ کھڑی ہے، لوگوں کو دنوں میں نہیں گھنٹوں میں ان کا قبضہ واپس ملا تھا۔ اُن کا کہنا ہے کہ غریب آدمی کہیں بھی ہو گا، مریم نواز اس کے ساتھ کھڑی ہے، کسی کے خلاف اعلان جنگ نہیں، نقطۂ نظر ہے، تصویر کا دوسرا رخ بتانا ہمارا فرض ہے۔

غیر قانونی قبضے کے کیسز

عظمیٰ بخاری نے کہا کہ غیر قانونی قبضہ ثابت ہونے پر ایک درخواست پر 90 روز میں فیصلہ کرنا ہوتا ہے، 5 ہزار 44 کیسز کا فیصلہ اور ان کا حق مل چکا ہے، جس پر ناجائز قابضین تھے۔ انہوں نے کہا کہ پراپرٹی کے 2 اعشاریہ 3 ملین کیسز زیرِ التواء ہیں، عدالت میں پراپرٹی کیسز کے فیصلوں میں 7 سے 10 سال لگتے ہیں۔ وزیرِ اطلاعات پنجاب نے کہا کہ پوری دنیا میں تیز تر انصاف کے لیے یہ قانون استعمال ہو رہا ہے تو پاکستان میں کیوں نہیں ہو سکتا۔