وزیراعظم شہباز شریف کا شہزادہ محمد بن سلمان کو فون، سعودی عرب کے ساتھ مکمل یکجہتی کا اظہار

ٹیلی فون پر گفتگو

اسلام آباد (ڈیلی پاکستان آن لائن) وزیرِ اعظمِ پاکستان محمد شہباز شریف نے آج شام مملکتِ سعودی عرب کے ولی عہد اور وزیرِ اعظم شہزادہ محمد بن سلمان بن عبدالعزیز آل سعود سے ٹیلی فون پر گفتگو کی۔ نہایت خوشگوار اور دوستانہ ماحول میں ہونے والی اس گفتگو کے دوران وزیرِ اعظم محمد شہباز شریف نے خادمِ حرمین شریفین شاہ سلمان بن عبدالعزیز آل سعود کے لیے دلی احترام اور نیک تمناؤں کا اظہار کیا، اور ساتھ ہی ولی عہد شہزادہ محمد بن سلمان کے لیے بھی خیرسگالی کے جذبات پیش کیے۔

یہ بھی پڑھیں: میڈیا میں جو تنخواہ رپورٹ ہوئی اس میں ایک صفر زیادہ لگا ہے، چیئرمین ایس ای سی پی کا سینیٹ کمیٹی خزانہ میں تنخواہ بتانے سے گریز

سعودی قیادت کا شکریہ

ترجمان وزیر اعظم ہاؤس کے مطابق وزیرِ اعظم نے پاکستان کے لیے سعودی قیادت کی گرمجوشی، محبت اور خاص توجہ پر ولی عہد کا شکریہ ادا کیا۔ دونوں رہنماؤں نے پاکستان اور سعودی عرب کے درمیان دیرینہ برادرانہ تعلقات کو مزید مضبوط بنانے کے عزم کا اعادہ کیا، جنہوں نے حالیہ مہینوں میں نئی بلندیوں کو چھوا ہے۔

یہ بھی پڑھیں: اسرائیل مخالف احتجاج کے دوران گرفتار سابق سینیٹر مشتاق احمد سمیت 24 ملزمان کی ضمانت منظور

علاقائی صورتحال پر تبادلہ خیال

گفتگو کے دوران دونوں رہنماؤں نے خطے کی مجموعی صورتحال اور موجودہ علاقائی پیش رفت پر بھی تبادلۂ خیال کیا۔ وزیرِ اعظم نے موجودہ چیلنجز کے تناظر میں امتِ مسلمہ کے درمیان اتحاد اور ہم آہنگی برقرار رکھنے کی ضرورت پر زور دیا۔ پاکستان کی جانب سے مملکتِ سعودی عرب کے ساتھ مکمل یکجہتی کا اظہار کرتے ہوئے وزیرِ اعظم نے کہا کہ علاقائی امن و استحکام کے قیام کے لیے مکالمہ اور سفارت کاری ناگزیر ہیں۔

ولی عہد کا جواب

ولی عہد شہزادہ محمد بن سلمان نے وزیرِ اعظم کی ٹیلی فون کال پر شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون کو وسعت دینے کی سعودی خواہش کا اعادہ کیا۔ انہوں نے آئندہ سال پاکستان کا سرکاری دورہ کرنے کی خواہش کا بھی اظہار کیا۔