کراچی پولیس نے گھروں میں وارداتیں کرنے والی کروڑ پتی ماسیوں کا 5 رکنی گینگ گرفتارکرلیا

گھروں میں وارداتیں کرنے والی ماسیوں کا گینگ گرفتار

کراچی (ڈیلی پاکستان آن لائن) پولیس نے گھروں میں وارداتیں کرنے والی کروڑ پتی ماسیوں کا 5 رکنی گینگ گرفتار کرلیا۔ یہ ماسیاں 9 سال سے پی ایچ سی ایچ میں ایک معروف صنعت کار کے بنگلے میں ملازمت کررہی تھیں اور انہوں نے چوری کی رقم سے گھر، گاڑی، موٹرسائیکل اور دیگر قیمتی اشیا خریدنے کا اعتراف کرلیا۔

یہ بھی پڑھیں: آبادی کو کنٹرول کرنا ہوگا، ہر سال ملک میں 61 لاکھ بچے پیدا ہو رہے ہیں: مصطفیٰ کمال

گینگ کی تفصیلات

ایکسپریس نیوز کے مطابق، ایس ایس پی ایسٹ زبیر نذیر شیخ نے بتایا کہ گرفتار ماسیاں پی ای سی ایچ ایس بلاک 6 میں واقع معروف صنعت کار کے گھر میں گزشتہ 9 سال سے کام کر رہی تھیں۔ گینگ کی سرغنہ عروج نے صنعت کار کے گھر کے لاکر کی چابی چرا کر 3 ہزار میں ڈپلیکیٹ بنوالی۔ ابتدائی تفتیش میں گرفتار سرغنہ نے صنعت کار کے گھر سے چوری کی رقم سے گھر، گاڑی، موٹرسائیکل اور دیگر قیمتی اشیا خریدنے کا انکشاف کیا ہے۔

یہ بھی پڑھیں: ایران نے بین الاقوامی ایٹمی توانائی ایجنسی کے ساتھ تعاون باضابطہ طور پر معطل کردیا

چوری کی رقم کا استعمال

گرفتار ماسی نے انکشاف کیا کہ اس نے چوری کی رقم سے 39 لاکھ روپے میں گھر، 30 لاکھ روپے میں گاڑی اور دو لاکھ 60 ہزار کی موٹر سائیکل خریدی تھی۔ چوری کی رقم سے خریدی گئی گاڑی رینٹ پر دی ہوئی ہے جبکہ موٹر سائیکل گرفتار ماسی عروج کا شوہر چلا رہا ہے۔

یہ بھی پڑھیں: روسی ڈرون حملہ، یوکرینی والد اپنے 3 کمسن بچوں سمیت ہلاک

گرفتار ماسیوں کی شناخت

گرفتار ماسیوں کی شناخت عروج، سویرا، نائلہ، ثنا اور علشبہ کے ناموں سے کی گئی ہے۔ ان کا تعلق وہاڑی، اوکاڑا، فیصل آباد، رحیم یار خان اور کوٹ ادو سے ہے۔ ان ماسیوں کے خلاف فیروز آباد تھانے میں نامزد مقدمہ درج ہے، جس کی تفتیش جاری ہے اور دوران تفتیش مزید انکشافات متوقع ہیں۔

عوام سے درخواست

ایس ایس پی نے عوام سے اپیل کی ہے کہ گھریلو ملازماؤں کو نوکری میں رکھنے سے قبل ان کا شناختی کارڈ، کوائف اور پولیس ویری فکیشن لازمی کروائیں۔ گرفتار ماسیوں کے خلاف متعلقہ تھانے میں مقدمہ درج کر لیا گیا ہے جبکہ واقعے سے متعلق مزید تفتیش جاری ہے۔