جیل کے اندر بانی پی ٹی آئی کی مختلف بیماریوں کا علاج ہوتا رہا ہے، وزیر مملکت بیرسٹر عقیل ملک

بیرسٹر عقیل ملک کا بیان

اسلام آباد(ڈیلی پاکستان آن لائن) وزیر مملکت برائے قانون بیرسٹر عقیل ملک کا کہنا ہے کہ جو بھی علاج ہوا وہ بانی پی ٹی آئی عمران خان کی اجازت سے ہوا، جیل کے اندر بانی پی ٹی آئی کی مختلف بیماریوں کا علاج ہوتا رہا ہے۔ پروگرام شاہ زیب خانزادہ کے ساتھ گفتگو کرتے ہوئے بیرسٹر عقیل ملک نے کہا کہ بانی پی ٹی آئی کو ہسپتال لے جانا ایک نان ایشو اور روٹین کا معاملہ ہے۔ انہوں نے کہا کہ پی ٹی آئی 8 فروری کے احتجاج سے متعلق معاملے کو طول دینا چاہتی ہے۔

یہ بھی پڑھیں: کوئی یہ نہیں سمجھے کہ دوبارہ احتجاجی تحریکیں نہیں چلیں گی، پی ٹی آئی

شفیع جان کا موقف

معاون خصوصی اطلاعات خیبرپختونخوا شفیع جان کا کہنا تھا کہ آج ہم اڈیالہ جیل کے باہر موجود ہیں اور رات یہیں رہیں گے۔ آج ہم نے بانی پی ٹی آئی کے معائنے کے لئے 3 ڈاکٹرز کے نام دیے مگر حکومت نے نہ مانی۔ انہوں نے کہا کہ بانی پی ٹی آئی کی صحت کو نان ایشو قرار دینا بہت افسوسناک ہے۔ شفیع جان کا کہنا تھا کہ دن میں 3 بار بانی پی ٹی آئی کا طبی معائنہ کیا جاتا ہے۔ ڈاکٹر نے ہمیں بتایا کہ مذکورہ پروسیجر 20 منٹ میں نہیں بلکہ 2 گھنٹے میں ہوتا ہے۔ بانی پی ٹی آئی کے ساتھ جو ہوا وہ نارمل نہیں ہے، ہم اسے نارمل ہونے نہیں دیں گے۔

آئندہ کی منصوبہ بندی

ان کا کہنا تھا کہ ہم جو کل کرنے جا رہے ہیں اس میں مجمع اکھٹا نہیں ہوگا۔ ہم ضمانت دیتے ہیں کہ ذاتی معالج باہر آ کر سیاسی بیان نہیں دے گا۔