ڈی آئی خان میں دہشت گردوں کی پولیس پر فائرنگ، ایس ایچ او سمیت 4 اہلکار شہید

پولیس آپریشن میں حملہ

ڈیرہ اسماعیل خان (ڈیلی پاکستان آن لائن) وانڈہ بڈھ کے علاقے میں پولیس آپریشن کے دوران دہشتگردوں نے فائرنگ کر دی جس کے نتیجے میں ایس ایچ او فہیم ممتاز سمیت 4 اہلکار شہید ہو گئے۔

یہ بھی پڑھیں: یمن کی صورتحال پر امریکی اور سعودی وزرائے خارجہ کا رابطہ

سرچ آپریشن کے دوران فائرنگ

پولیس کے مطابق حملہ اس وقت کیا گیا جب اہلکار علاقے میں سرچ آپریشن کر رہے تھے۔ شدید فائرنگ کے تبادلے میں ڈی ایس پی سمیت 3 اہلکار زخمی بھی ہوئے جنہیں فوری طور پر قریبی اسپتال منتقل کردیا گیا ہے۔ واقعے کے بعد پولیس اور سیکیورٹی فورسز کی اضافی نفری موقع پر پہنچی اور علاقے کو گھیرے میں لے کر سرچ آپریشن مزید تیز کر دیا گیا۔

حملہ آوروں کی تلاش جاری

حکام کا کہنا ہے کہ حملہ آوروں کی تلاش جاری ہے اور انہیں جلد کیفر کردار تک پہنچایا جائے گا۔ شہید اہلکاروں کی قربانی کو خراج عقیدت پیش کرتے ہوئے پولیس حکام نے دہشتگردی کے خلاف کارروائیاں جاری رکھنے کے عزم کا اعادہ کیا ہے۔