بانی پی ٹی آئی کی صحت سے متعلق کوئی بیان نہیں دیا، وکیل سلمان صفدر کی وضاحت

سلمان صفدر کا بیان

اسلام آباد(ڈیلی پاکستان آن لائن) فرینڈ آف کورٹ کے طور پر بانی پی ٹی آئی سے ملاقات کرنے والے وکیل سلمان صفدر نے کہا ہے کہ انہوں نے بانی کی صحت پر کوئی بیان نہیں دیا، ہرگز نہیں دیا۔ اگر کسی نے ان کے لفظ ’’ٹھیک‘‘ کی غلط تشریح کی ہے تو یہ مس رپورٹنگ ہے۔

یہ بھی پڑھیں: پشاور ہائیکورٹ نے 5 جوڈیشل افسران کے تبادلے کر دیئے

ملاقات کی تفصیلات

سلمان صفدر نے مزید کہا کہ میں نے جو بھی وہاں دیکھا ہے اور جو بھی انٹرایکشن ہوا، وہ سب سپریم کورٹ میں جمع کروائی گئی اپنی رپورٹ میں لکھ دیا ہے۔ بانی پی ٹی آئی کے وکیل نے واضح کیا کہ میں نے عدالتی حکم پر بانی پی ٹی آئی سے ملاقات کی، سیل کا معائنہ بھی کیا، لیکن بانی کی صحت سے متعلق پارٹی کے سیکریٹری جنرل سلمان اکرم راجا اور بانی کی بہن علیمہ خان کو بھی کچھ نہیں بتایا اور انہوں نے میری پوزیشن سمجھتے ہوئے اس کا برا نہیں منایا۔

میڈیا کے سوالات کا جواب

خیال رہے کہ سلمان صفدر نے گذشتہ روز بانی پی ٹی آئی سے عدالتی حکم پر ملاقات کی تھی۔ اڈيالہ جیل کے باہر میڈيا نے سوال پوچھا کہ بانی پی ٹی آئی کی صحت کیسی ہے، جس پر سلمان صفدر کا جواب تھا ’’ٹھیک‘‘۔ سلمان صفدر نے بانی پی ٹی آئی سے ملاقات کے بعد اپنی رپورٹ سپریم کورٹ میں جمع کروا دی۔