لاہور قلندرز کا صحافیوں کے لیے دو روزہ کرکٹ ٹورنامنٹ کا اعلان

لاہور قلندرز کا دو روزہ کرکٹ ٹورنامنٹ کا اعلان

لاہور(ڈیلی پاکستان آن لائن) پاکستان سپر لیگ کی معروف فرنچائز لاہور قلندرز نے لاہور، کراچی اور اسلام آباد پریس کلب کے ممبران کے مابین دو روزہ کرکٹ ٹورنامنٹ منعقد کرنے کا اعلان کیا ہے۔ لاہور پریس کلب میں میڈیا سے گفتگو کرتے ہوئے سی ای او لاہور قلندرز عاطف نعیم رانا نے کہا کہ صحافی ہمیشہ دوسروں کی کوریج کرتے ہیں، اس بار ہم چاہتے ہیں کہ وہ خود میدان میں اتریں اور میڈیا ان کی کوریج کرے۔

یہ بھی پڑھیں: وفاقی بیورو کریسی میں تقرر و تبادلے

میچز کا فارمیٹ اور شیڈول

عاطف رانا نے واضح کیا کہ میچز کا فارمیٹ (ٹیپ بال یا ہارڈ بال) اور شیڈول پریس کلبز کی مشاورت سے طے کیا جائے گا۔ ایک سوال کے جواب میں انہوں نے کہا کہ شاہین آفریدی اور حارث رؤف کو بہترین ماحول اور اعتماد فراہم کیا گیا ہے، انہیں صرف توجہ کی ضرورت ہے۔ ہاکی فیڈریشن سے دوری کے حوالے سے ان کا کہنا تھا کہ یہ عارضی ہے، ہم قومی کھیل کے فروغ کے لیے مناسب وقت کے منتظر ہیں۔

پریس کلب کے صدر کا ردعمل

لاہور پریس کلب کے صدر ارشد انصاری نے اس اقدام کو سراہتے ہوئے کہا کہ عاطف رانا پلیئر ڈویلپمنٹ پروگرام کے ذریعے نچلی سطح پر کرکٹ کو نئے عروج پر لے گئے ہیں۔ انہوں نے صحافیوں کے لیے اس ایونٹ کو ایک بہترین تفریحی اور صحت مند سرگرمی قرار دیتے ہوئے قلندرز کی انتظامیہ کا شکریہ ادا کیا۔