افغانستان میں شوہر کو بیوی اور بچوں کو مارنے کی اجازت دے دی گئی بشرطیکہ تشدد سے ہڈیاں نہ ٹوٹیں یا کھلے زخم نہ آئیں

نیا تعزیری ضابطہ

کابل(ڈیلی پاکستان آن لائن) افغانستان میں برسرِ اقتدار طالبان کی جانب سے ایک نیا تعزیری ضابطہ نافذ کیے جانے کی اطلاعات سامنے آئی ہیں، جس میں گھریلو معاملات اور سزاؤں سے متعلق متعدد شقیں شامل ہیں۔ ساٹھ صفحات پر مشتمل اس دستاویز پر طالبان کے سپریم لیڈر ہیبت اللہ اخوندزادہ کے دستخط بتائے جاتے ہیں اور اسے ملک بھر کی عدالتوں کو بھجوا دیا گیا ہے۔

یہ بھی پڑھیں: عمران خان کو اب جیل ملاقات کی بالکل اجازت نہیں اور مجمع اکٹھا کرنے کی بھی اجازت نہیں ہوگی: عطا تارڑ

کمزور خواتین کے حقوق

ڈان نیوز کے مطابق بیوی کو مارنے کے عمل کو تعزیر کے زمرے میں رکھا گیا ہے، جسے فوجداری جرم کے بجائے صوابدیدی سزا کے طور پر بیان کیا گیا ہے۔ ضابطے میں درج ہے کہ شوہر مخصوص حد تک جسمانی طاقت استعمال کر سکتا ہے، تاہم اگر چوٹ قانون میں مقررہ حد سے بڑھ جائے تو عدالت کارروائی کر سکتی ہے۔ آرٹیکل 32 کے تحت اگر بیوی عدالت میں یہ ثابت کر دے کہ اسے شدید تشدد کا نشانہ بنایا گیا جس کے نتیجے میں ہڈی ٹوٹی، زخم آیا یا جسم پر واضح نیل پڑے، تو شوہر کو زیادہ سے زیادہ 15 دن قید کی سزا دی جا سکتی ہے۔ شکایت درج کرانے کے طریقۂ کار سے متعلق کہا گیا ہے کہ خاتون کو مرد جج کے سامنے پیش ہونا ہوگا، مکمل پردے کا اہتمام کرنا ہوگا اور کسی مرد سرپرست کے ہمراہ عدالت آنا ہوگا۔

یہ بھی پڑھیں: کلبھوشن یادیو جیسا ایک اور بھارتی اہلکار گرفتار، یہ کہاں سے پکڑا گیا اور اس کا نام کیا ہے؟ بڑا انکشاف

خواتین کی قید کی سزائیں

آرٹیکل 34 کے مطابق اگر کوئی خاتون شوہر کی اجازت کے بغیر اپنے والدین کے گھر چلی جائے تو اسے تین ماہ تک قید کی سزا دی جا سکتی ہے۔ مزید یہ کہ ایسے رشتہ دار جو خاتون کو پناہ فراہم کریں، انہیں بھی اسی نوعیت کی سزا کا سامنا کرنا پڑ سکتا ہے۔

معاشرتی درجہ بندی

ضابطے کے آرٹیکل 9 میں افغان معاشرے کو چار طبقات علما، اشرافیہ، متوسط طبقہ اور نچلا طبقہ میں تقسیم کیا گیا ہے۔ اس شق کے مطابق ایک ہی جرم کی سزا سماجی حیثیت کے لحاظ سے مختلف ہو سکتی ہے، جو نصیحت سے لے کر قید یا جسمانی سزا تک ہو سکتی ہے۔