چودھری شافع حسین کی چینی قونصل جنرل سے ملاقات، انڈسٹری ڈیپارٹمنٹ اور قونصلیٹ کے مابین ورکنگ گروپ تشکیل دینے کی تجویز پر اتفاق

لاہور(ڈیلی پاکستان آن لائن) وزیر صنعت و تجارت پنجاب چودھری شافع حسین نے لاہور میں نئے تعینات ہونے والے چین کے قونصل جنرل سن یان سے ملاقات کی۔ اس ملاقات میں انڈسٹری ڈیپارٹمنٹ اور قونصلیٹ کے مابین ورکنگ گروپ تشکیل دینے کی تجویز پر اتفاق کیا گیا۔

ملاقات میں انفارمیشن ٹیکنالوجی، ای وی سیکٹر، صنعت، زراعت کے شعبوں میں اشتراک بڑھانے پر تبادلہ خیال کیا گیا۔

وزیر صنعت و تجارت چودھری شافع حسین کا کہنا تھا کہ پنجاب میں چینی کمپنیوں نے اربوں روپے کی سرمایہ کاری کی ہے۔ چین ٹیکسٹائل سیکٹر میں دو نئی فیکٹریاں لگا رہا ہے، جس سے روزگار کے 21 ہزار مواقع پیدا ہوں گے۔ چینی سرمایہ کاروں کو پنجاب میں سرمایہ کاری کے لیے ہر ممکن سہولت فراہم کی جائے گی۔

چینی قونصل جنرل کا کہنا تھا کہ وہ چین اور پاکستان کے مابین معاشی تعاون کو قدر کی نگاہ سے دیکھتے ہیں اور پنجاب میں چینی کمپنیوں کی سرمایہ کاری بڑھانے کے لیے مسلسل کوششیں کریں گے۔