تیری چھاؤں روٹھی ہے تو ہر خوشی بھی روٹھی ہے۔۔۔

چھوڑا ہے جب سے شہر ترا اور مکان ، ماں

لکھتی رہی ہوں درد کی میں داستان ، ماں

روٹھی ہے تیری چھاؤں تو روٹھی ہے ہر خوشی
سر پر مرے نہیں ہے کوئی سائبان ، ماں

میرے وجود میں ہیں جو کانٹے اُگے ہوئے
بوتا رہا ہے خار سدا باغبان ، ماں

کانٹے چھُبے ہیں پاؤں میں اور تھک گئی ہوں میں
منزل کا پھر بھی کوئی نہیں ہے نشان ، ماں

تجھ سے بچھڑ کے پھر مجھے فرحت نہیں ملی
خوشیوں سے گو کہ پر ہے یہ سارا جہان ماں

کلام :ڈاکٹر فرزانہ فرحت ( لندن)