سری لنکن ایئرلائن Fits Air نے پاکستان میں اپنی فضائی سروسز کا باقاعدہ آغاز کر دیا

سری لنکن ایئرلائن کا پاکستان میں آغاز

لاہور (ڈیلی پاکستان آن لائن) سری لنکن ایئرلائن Fits Air نے پاکستان میں اپنی فضائی سروسز کا باقاعدہ آغاز کر دیا ہے، جس کے تحت کولمبو سے لاہور کے لیے پہلی براہِ راست پرواز ہفتہ کی شام لاہور پہنچی۔ ایوی ایشن حکام کے مطابق پرواز 8D-981 علامہ اقبال انٹرنیشنل ایئرپورٹ پر رات 8 بج کر 35 منٹ پر اتری، جس میں 134 مسافر سوار تھے۔ یہ پرواز پاکستانی مارکیٹ میں ایئرلائن کے باضابطہ داخلے کی علامت ہے۔

یہ بھی پڑھیں: قحط کیا ہے، کسی علاقے کو قحط زدہ قرار دینے کی کیا شرائط ہیں اور غزہ کو جلد ہی اس تک پہنچنے کا خطرہ کیوں ہے؟

فضائی روابط میں بہتری

عرب نیوز کے مطابق حکام کا کہنا ہے کہ اس نئی سروس سے پاکستان اور سری لنکا کے درمیان فضائی روابط میں بہتری آئے گی اور دونوں ممالک کے درمیان سفر کے مزید مواقع پیدا ہوں گے۔ پاکستان ایئرپورٹس اتھارٹی کے مطابق لاہور پہنچنے پر مسافروں کا پرتپاک استقبال کیا گیا اور انہیں گلاب کے پھول پیش کیے گئے، جبکہ اس موقع پر ایک خصوصی کیک کاٹنے کی تقریب بھی منعقد کی گئی۔

یہ بھی پڑھیں: حکومت مذاکرات میں سنجیدہ ہے تو ہم بات کرنے کو تیار ہیں: اسد قیصر

واپسی کی پرواز

افتتاحی تقریب کے بعد اسی ایئرلائن کی واپسی پرواز 8D-982 رات 9 بج کر 40 منٹ پر کولمبو کے لیے روانہ ہوئی، جس میں 66 مسافر سوار تھے۔

یہ بھی پڑھیں: آبنائے ہرمز سے پاکستانی پرچم بردار مزید 20 جہازوں کو گزرنے کی اجازت مل گئی ہے : وزیر خارجہ اسحاق ڈار

پاکستان اور سری لنکا کے تعلقات

پاکستان اور سری لنکا کے درمیان تعلقات قیامِ پاکستان کے ابتدائی برسوں سے مضبوط رہے ہیں، جن میں تجارت، دفاع اور علاقائی سفارتکاری کے شعبے شامل ہیں۔ پاکستان ان ابتدائی ممالک میں شامل تھا جنہوں نے سری لنکا کو تسلیم کیا اور بعد ازاں کولمبو کی خانہ جنگی کے دوران بھی اس کی معاونت کی۔ دونوں ممالک سارک کے رکن ہیں اور خطے میں استحکام اور اقتصادی تعاون کے حوالے سے اکثر ایک دوسرے کے مؤقف کی حمایت کرتے رہے ہیں۔

تجارتی تعلقات کی وسعت

2005 میں ہونے والے آزاد تجارتی معاہدے کے تحت دونوں ممالک کے درمیان ٹیکسٹائل، چائے، چاول اور ادویات کی تجارت کو فروغ ملا، اگرچہ اس میں مزید وسعت کی گنجائش موجود ہے۔ حالیہ برسوں میں دونوں ممالک نے ہوا بازی، سیاحت اور تعلیم کے شعبوں میں تعاون بڑھانے پر زور دیا ہے، اور نئی فضائی سروس کو عوامی روابط اور کاروباری سرگرمیوں کے فروغ کے لیے اہم پیش رفت قرار دیا جا رہا ہے۔