شاپور جی سکلت: بھارت کے ایک امیر خاندان کے سیاستدان جنہوں نے اپنے نام کے ساتھ ‘ٹاٹا’ نہیں لگایا

شاید آپ نے شاپور جی سکلت والا کا نام نہ سنا ہو اور شائد تاریخ کی کتابوں میں بھی ان کا ذکر نمایاں طور پر نہ ملے لیکن ماضی کی کسی بھی اچھی کہانی کی طرح، ان کی کہانی بھی دلچسپیوں سے خالی نہیں ہے۔

اس کے لیے اتنا جاننا ہی ایک دلچسپی کا باعث ہو سکتا ہے کہ ان کا تعلق انڈیا کے سب سے امیر خاندان، ٹاٹا سے تھا۔

ہر موڑ پر ایسا لگتا ہے کہ ان کی زندگی جہد مسلسل، مزاحمت اور استقامت سے بھری ہوئی تھی۔ انہوں نے نہ تو اپنے امیر کزنز کی طرح اپنے نام کے ساتھ ’ٹاٹا‘ لگایا اور نہ ہی ان کی دولت میں شراکت داری کی۔

دنیا کی سب سے بڑی کاروباری سلطنتوں میں سے ایک، ٹاٹا گروپ کو چلانے کے لیے وہ آگے نہیں آئے بلکہ اس کے بجائے ایک بااثر سیاست دان بنے اور انہوں نے برطانوی پارلیمان میں تاج برطانیہ سے ہندوستان کی آزادی کے لیے جدوجہد کی۔

یہاں تک کہ ان کا مہاتما گاندھی سے بھی، جو انڈیا کی آزادی میں کلیدی کردار ادا کرنے والے تھے، تصادم ہوا۔

یہاں یہ سوال دلچسپی کا باعث ہے کہ اتنے بڑے تاجر گھرانے میں پیدا ہونے والے سکلت والا نے اپنے رشتہ داروں سے مختلف راستہ کیوں اختیار کیا؟

اور انہوں نے برطانیہ میں پہلے ایشیائی رکن پارلیمنٹ بننے کی راہ کیسے ہموار کی؟ اس کا جواب اتنا ہی پیچیدہ ہے جتنا کہ سکلت والا کے اپنے خاندان کے ساتھ تعلقات۔

سکلت والا کپاس کے تاجر دوراب جی سکلت والا اور جر بائی کے بیٹے تھے۔ جربائی جمسیت جی، نوشیرواں جی ٹاٹا کی سب سے چھوٹی بیٹی تھیں جنھوں نے ٹاٹا گروپ کی بنیاد رکھی تھی۔

جب سکلت والا 14 سال کے تھے، ان کا خاندان بمبئی کے سپلینیڈ ہاؤس میں جربائی کے بھائی (جن کا نام بھی جمسیت جی تھا) اور ان کے خاندان کے ساتھ رہنے کے لیے چلا گیا۔

سکلت والا کے والدین اس وقت الگ ہو گئے جب وہ ابھی نو عمر تھے اور اس طرح چھوٹے جمسیت جی ان کی زندگی کی اہم شخصیت بن گئے۔

سکلت والا کی بیٹی سحری اپنے والد کی سوانح عمری ’دی ففتھ کمانڈمنٹ‘ میں لکھتی ہیں کہ ’جمسیت جی ہمیشہ شاپور جی کو خاصا پسند کرتے تھے اور انہوں نے بہت کم عمری سے ہی ان میں بڑی صلاحیتوں کے امکانات دیکھے تھے، انہوں نے ان پر بہت زیادہ توجہ دی۔‘

لیکن جمسیت جی کی سکلت والا سے محبت نے ان کے بڑے بیٹے دوراب جی کو اپنے چھوٹے کزن سے ناراض کر دیا۔

سحری لکھتی ہیں کہ ’بچپن سے لے کر بڑے ہونے تک وہ ہمیشہ ایک دوسرے کے مخالف رہے اور ان کا اختلاف کبھی ختم نہیں ہوا۔‘

اس کے نتیجے میں دوراب جی خاندانی کاروبار میں سکلت والا کے کردار کو کم کرنے کا باعث بنے اور سکلت والا کو ایک مختلف راستہ چننے پر مجبور کیا۔

لیکن خاندانی چپقلش کے علاوہ سکلت والا 1890 کی دہائی کے آخر میں بمبئی میں آنے والے بوبونک طاعون کی وجہ سے ہونے والی تباہی سے بھی متاثر ہوئے۔ انھوں نے دیکھا کہ کس طرح اس وبا نے غریب اور محنت کش طبقے کو متاثر کیا، جبکہ ان کے خاندان سمیت معاشرتی اعلیٰ طبقے کے لوگ اس وبا میں نسبتاً محفوظ رہے۔

اس دوران سکلت والا کالج میں تھے اور انھوں نے ایک روسی سائنسدان والڈیمار ہافکائن کے ساتھ مل کر کام کیا۔ ہافکائن کو اپنی انقلابی سیاست کی وجہ سے اپنے ملک سے بھاگنا پڑا تھا۔ ہافکائن نے طاعون سے لڑنے کے لیے ایک ویکسین تیار کی اور سکلت والا گھر گھر جا کر لوگوں کو ٹیکہ لگوانے پر راضی کرتے تھے۔

سحری لکھتی ہیں کہ ’ان دونوں کے نقطہ نظر میں بہت کچھ مشترک تھا اور اس میں کوئی شک نہیں کہ اصول پسند بوڑھے سائنسدان اور نوجوان ہمدرد طالب علم کے درمیان قریبی تعلق نے ضرور شاپور جی کے نظریات کو تشکیل دینے اور ان کو مضبوط کرنے میں مدد کی ہوگی۔‘

ایک اور اہم اثر سیلی مارش کے ساتھ ان کا رشتہ تھا۔ سیلی مارش ایک ویٹریس تھیں جن سے انھوں نے سنہ 1907 میں شادی کی۔

سیلی مارش اپنے والدین کے 12 بچوں میں سے چوتھے نمبر پر تھیں۔ انھوں نے کم عمری میں ہی اپنے والد کو کھو دیا۔ مارش کے گھرانے میں زندگی بہت مشکل تھی کیونکہ ہر ایک کو گزارہ کرنے کے لیے سخت محنت کرنی پڑتی تھی۔

لیکن اچھی بنیاد سے آنے والے سکلت والا ویٹرس سیلی مارش کی طرف متوجہ ہوئے اور ان کی صحبت کے دوران سکلت والا نے سیلی کی زندگی کے ذریعے برطانیہ کے محنت کش طبقے کی مشکلات کو دیکھا اور محسوس کیا۔

سحری لکھتی ہیں کہ ان کے والد پادریوں اور راہباؤں کی بے لوث زندگیوں سے بھی متاثر تھے جن کے تحت انھوں نے اپنے سکول اور کالج کے برسوں میں تعلیم حاصل کی تھی۔

چنانچہ سکلت والا جب سنہ 1905 میں برطانیہ پہنچے تو انھوں نے غریبوں اور پسماندہ لوگوں کی مدد کرنے کے مقصد سے سیاست کے میدان میں اترنے کی ٹھان لی۔

انھوں نے سنہ 1909 میں لیبر پارٹی اور 12 سال بعد کمیونسٹ پارٹی میں شمولیت اختیار کی۔ وہ ہندوستان اور برطانیہ میں محنت کش طبقے کے حقوق کا بہت خیال رکھتے تھے اور سمجھتے تھے کہ صرف سوشلزم ہی غربت کو ختم کر سکتی ہے اور لوگوں کو حکمرانی میں ان کا حق دے سکتی ہے۔

اس دوران سکلت والا کی تقریروں کو خوب پذیرائی ملی اور وہ جلد ہی ایک مقبول چہرہ بن گئے۔ سنہ 1922 میں وہ پارلیمنٹ کے لیے منتخب ہوئے اور تقریباً سات سال تک رکن پارلیمنٹ کے طور پر خدمات انجام دیں۔